អូបាឌា
ចូរអាន ខ.១ តើកណ្ឌអូបាឌាបង្ហាញយើងអំពីស្រុកមួយណានៅក្នុងនិមិត្តហេតុដ៏អស្ចារ្យ ដែលព្រះជាម្ចាស់សំដែងអោយលោកអូបាឌាឃើញ?
ការពន្យល់ ជនជាតិអេដំមគឺជាពូជពង្សរបស់អេសាវ (លោកុប្បត្ដិ ២៥:២៥-២៦)។ អេសាវជាកូនប្រុសច្បងអ៊ីសាក (លោកុប្បត្ដិ ៣៦:១,៩)។ អេដំមមានន័យថាពណ៌ក្រហម (លោកុប្បត្ដិ ២៥:៣០)។
ចូរអាន ខ.២-៤ តាមព្រះបន្ទូលរបស់ព្រះជាម្ចាស់នៅទីនេះ តើ មានហេតុការណ៍អ្វីដែលត្រូវកើតមានដល់ស្រុកអេដំម?
ការពន្យល់ ស្រុកអេដំមជាតំបន់ដែលមានភ្នំដ៏ខ្ពស់ ហើយពួកគេបានរស់នៅតាមក្រហែងថ្មហើយគេស្មានគិតថា ពួកគេបានរស់នៅយ៉ាងសុខសាន្តនៅក្នុងស្រុកនោះ។
ចូរអាន ខ.៥-៧ តើ មានហេតុការណ៍អ្វីដែលត្រូវកើតមានដល់ស្រុកអេដំម?
ការពន្យល់ ខ.៥-ស្រុកអេដំមមានចំការទំពាំងបាយជូរដ៏ល្អជាច្រើន។ ខ.៧-នៅសម័យនោះប្រទេសធ្លាប់មានបក្សសម្ព័ន្ធ ប្រយោជន៍ដើម្បីអោយគេមានសេចក្ដីសុខសាន្ត ប៉ុន្តែអត្ថបទនេះប្រកាសថា បក្សសម្ព័ន្ធរបស់អេដំមនឹងមិនជួយពួកគេទេ។ ដូច្នេះ ខ.១-៧ បានប្រកាសថា ពួកអ្នកទាំងប៉ុន្មានដែលជនជាតិអេដំមទុកចិត្ត ប្រយោជន៍អោយខ្លួនបានសេចក្ដីសុខសាន្ត ក៏ត្រូវរលាយសូន្យទៅដែរ។
ចូរអាន ខ.៨-៩ តើ ព្រះជាម្ចាស់បានសំរេចថានឹងប្រព្រឹត្តអ្វីចំពោះអេដំម?
ចូរអាន ខ.១០-១៤ តើ ហេតុអ្វីបានជាព្រះជាម្ចាស់មានសេចក្ដីក្រោធចំពោះអេដំមហើយនឹងវិនិច្ឆ័យពួកគេ?
ការពន្យល់ អស់រយៈពេលយ៉ាងយូរ អេដំមចេះតែចាត់ទុកអ៊ីស្រាអែលជាសត្រូវសួរពូជរបស់ខ្លួន (អេសេគាល ៣៥:៥)។ មានរឿងរវាងពួកគេទាំងពីរ ចាប់តាំងពីរ អេសាវនិងយ៉ាកុប (លោកុប្បត្ដិ ២៥:២៧-៣៤, ២៧:១-២៩; ជនគណនា ២០:១៤-២១)។ ដោយសារអេដំមសប្បាយរីករាយនៅពេលឃើញពូជពង្សអ៊ីស្រាអែល ជាប្រជារាស្ត្ររបស់ព្រះអម្ចាស់ រងទុក្ខសោកសង្រេង ព្រះជាម្ចាស់ក៏នឹងធ្វើអោយអេដំមធ្លាក់ខ្លួនរងទុក្ខវេទនាយ៉ាងនោះដែរ។
ចូរអាន ខ.១៥-១៦ តើ មានហេតុការណ៍អ្វីខ្លះដែលត្រូវកើតមាននៅ «ថ្ងៃរបស់ព្រះយេហូវ៉ា»?
ចូរអាន ខ.១៧-១៨ តើ មានហេតុការណ៍អ្វីខ្លះទៀតដែលនឹងត្រូវកើតមាននៅ «ថ្ងៃរបស់ព្រះយេហូវ៉ា»?
ចូរអាន ខ.១៩-២១ តើ មានហេតុការណ៍អ្វីខ្លះទៀតដែលនឹងត្រូវកើតមាននៅ «ថ្ងៃរបស់ព្រះយេហូវ៉ា»?
ការពន្យល់ ពួកហោរាបានប្រកាសអំពី «ថ្ងៃរបស់ព្រះយេហូវ៉ា» ដែលជាថ្ងៃដែលព្រះអង្គនឹងវិនិច្ឆ័យនិងដាក់ទោសដល់ប្រជាជាតិទាំងអស់ (ជាពិសេសខ្មាំងសត្រូវរបស់រាស្រ្តរបស់ព្រះ) ហើយនិងសង្គ្រោះរាស្ត្ររបស់ទ្រង់។
ការអនុវត្ត នៅក្នុងសញ្ញាថ្មីអ្នកនិពន្ធលែងប្រើពាក្យ «ថ្ងៃរបស់ព្រះយេហូវ៉ា» ទៀតហើយ ប៉ុន្តែប្រើពាក្យ «ថ្ងៃជំនុំជំរះ» (ឧទាហរណ៍ ម៉ាថាយ ១០:១៥; ១១:២២,២៤; ១២:៣៦) ឬ «ថ្ងៃនៃព្រះគ្រីស្ទ» (១កូរិនថូស ១:៨; ២កូរិនថូស ១:១៤; ភីលីព ១:៦,១០; ២:១៦) ឬ «ថ្ងៃនៃព្រះអម្ចាស់» វិញ។ អត្ថបទទាំងប៉ុន្មាននេះបានសំដៅទៅលើថ្ងៃព្រះគ្រីស្ទយាងមកវិញ ដែលទ្រង់នឹងវិនិច្ឆ័យនិងដាក់ទោសដល់ប្រជាជាតិទាំងអស់ ហើយនឹងសង្គ្រោះរាស្រ្តរបស់ព្រះ (អស់អ្នកដែលនៅក្នុងព្រះគ្រីស្ទ)។ តាមប្រវត្តិសាស្ត្រ ព្រះជាម្ចាស់បានដាក់ទោសលើអេដំមហើយបំផ្លាញពួកគេតាមព្រះបន្ទូលដែលទ្រង់បានប្រកាសជាមុនតាមរយៈអូបាឌា ហើយនេះជាភស្តុតាងបង្ហាញថា ព្រះអង្គនឹងសម្រេចសេចក្ដីសន្យាអំពីការយាងមកវិញរបស់ព្រះគ្រីស្ទ។ ព្រះបន្ទូលរបស់ព្រះអង្គតែងតែនឹងធ្វើសំរេចតាមគ្រប់ទាំងការដែលទ្រង់បានចាត់ឲ្យធ្វើ។ ដូច្នេះ យើងទន្ទឹងរង់ចាំព្រះជាម្ចាស់ប្រោសយើងនៅថ្ងៃនោះ ហើយយើងត្រូវរៀបចំខ្លួនជាស្រេចដើម្បីជួបនឹងព្រះជាម្ចាស់របស់យើង។
រំលឹកទ្បើងវិញ៖ តើយើងបានរៀនអ្វីចេញពីកណ្ឌអូបាឌា?
ការអនុវត្ត: តាមអ្វីដែលអ្នកបានរៀនតាមរយៈបទគម្ពីរនេះ តើអ្នកត្រូវយកវាមកអនុវត្តន៍យ៉ាងដូចម្តេចនាពេលសព្វថ្ងៃនេះ?
Leave a Reply