១ពេត្រុស ១:១៣–២:៣
សូមអាន ១ពេត្រុស ១:១៣–២:៣ ទាំងមូលទាំងអស់គ្នា។
សេចក្តីផ្តើម៖ពេត្រុសចាប់ផ្តើមក្នុងបទគម្ពីរនេះដោយពាក្យ «ដូច្នេះ…» ដែលជាការហៅឲ្យមានសកម្មភាព ដែលគាត់ភ្ជាប់យ៉ាងច្បាស់លាស់ពីបរិបទនៃសេចក្តីសង្គ្រោះ ដែលគាត់បានពិភាក្សានៅក្នុងខ. ២ រហូតដល់ខ. ១២។ ពេត្រុសបានបរិយាយសេចក្តីសង្គ្រោះនេះដោយឃ្លាជាច្រើនខុសៗគ្នាដូចជា ការងារញែកជាបរិសុទ្ធ (១:២) តាមសេចក្តីមេត្តាករុណាដ៏ធំ (១:៣) ដោយសារព្រះយេស៊ូវបានរស់ពីសុគតទ្បើងវិញ (១:៣) បង្កើតជាថ្មី (១:៣) មរដកដែលមិនចេះពុករលួយ (១:៤) សេចក្តីដែលពួកហោរានិងពួកទេវតាចូលចិត្តពិនិត្យមើល (១:១២)។
«ដូច្នេះ…..» ដោយសារគ្រីស្ទបរិស័ទមានសេចក្តីសង្គ្រោះដ៏អស្ចារ្យបែបនេះ ទើបគាត់ទទូចឲ្យពួកអ្នកអានរបស់គាត់ រស់នៅជាជីវិតបរិសុទ្ធ និងគោលបំណងច្បាស់លាស់មួយ។
សូមអានខ.១៣–១៤ ទ្បើងវិញ។ តើការយាងមកជាលើកទីពីររបស់ព្រះគ្រីស្ទមានសារៈសំខាន់សំរាប់គ្រីស្ទបរិស័ទយ៉ាងដូចម្តេចខ្លះ?
តើអ្វីខ្លះជាពាក្យបួនដែលពេត្រុសពិពណ៌នាអំពីជីវិតដែលមានព្រះ ដែលបីនៅក្នុងខ. ១៤ ហើយមួយនៅក្នុងខ. ១៩?
១. ២. ៣. ៤.
សូមអាន ខ. ១៥–១៦, លេវីវិន័យ ១១:៤៥ និងអេភេសូរ ២:៨–១០ ហើយពិភាក្សាសំនួរខាងក្រោម។
តើមានអ្វីដែលមិនបរិសុទ្ធនៅក្នុងជីវិតដែលអ្នកត្រូវការប្រែចិត្តដែរឬទេ?
សូមអានខ. ១៧។ ពេត្រុសហៅពួកអ្នកអានរបស់គាត់ឲ្យមានជីវិតបរិសុទ្ធពីព្រោះតែព្រះវរបិតាទ្រង់ធ្វើអ្វី?
សូមអានខ. ១៨–១៩។ តើព្រះវរបិតាបានលោះគ្រីស្ទបរិស័ទឲ្យរួចពីកិរិយាឥតប្រយោជន៍ដោយសារអ្វី?
សូមអានខ. ២០–២១។ តើលក្ខណៈសម្បត្តិទាំងបីរបស់ព្រះយេស៊ូវនៅក្នុងខទាំងនេះមានអ្វីខ្លះ?
១. ២. ៣.
ការពន្យល់៖ ពេត្រុសអះអាងដល់ពួកអ្នកអានរបស់គាត់ថា ការងារដែលព្រះយេស៊ូវគ្រីស្ទបានយាងមកប្រោសលោះពួកគេមិនមែនជារឿងចៃដន្យនោះឡើយ ប៉ុន្តែការងារនេះស្ថិតក្នុងផែនការណ៍សង្គ្រោះរបស់ព្រះវរបិតា ដែលមានតាំងពីមុនកំណើតលោកិយមកម៉្លេះ។ ហើយលក្ខណៈសម្បត្តិទាំងបីរបស់ព្រះយេស៊ូវនៅទីនេះ គួរតែជាភស្តុតាងបញ្ជាក់ថា ទ្រង់គឺជាព្រះរាជបុត្រាពិតនៃព្រះ ដែលត្រូវយាងមកតាមបទគម្ពីរ ហើយធានាថា សេចក្តីសង្គ្រោះដែលពួកគេកំពុងមានគឺពិតប្រាកដ ហើយទោះស្ថិតក្នុងស្ថានភាពលំបាកយ៉ាងណា ពួកគេគួរតែបន្តរស់នៅជាជីវិតបរិសុទ្ធ និងរង់ចាំដល់ការយាងមកជាលើកទីពីររបស់ទ្រង់ ដើម្បីទទួលបានសេចក្តីសង្គ្រោះដ៏ពេញលេញ។ តើសេចក្តីពិតទាំងនេះជាសេចក្តីអំណរដ៏ធំយ៉ាងណាដល់គ្រីស្ទបរិស័ទទាំងអស់ទៅ! ចុះអ្នកវិញ តើអ្នកមានអំណរនិងបន្តរស់នៅសំរាប់ការយាងមកវិញរបស់ទ្រង់ដែរទេ?
សូមអានខ. ២២–២៣។ ទាក់ទងនឹងការដែលព្រះបង្កើតយើងជាថ្មី ពេត្រុសបានបរិយាយអំពីពាក្យបី តើពាក្យទាំងបីនោះមានអ្វីខ្លះ?
១. ២. ៣.
សូមអានខ. ២៤–២៥ ហើយសូមបំពេញចន្លោះខាងក្រោមនេះ។
គ្រប់ទាំងមនុស្សប្រៀបដូចជា ហើយសិរីល្អទាំងប៉ុន្មានរបស់មនុស្សក៏ដូចជា រីឯធម្មតាស្មៅនោះតែងតែ ហើយផ្កាក៏ តែឯព្រះបន្ទូលនៃព្រះអម្ចាស់ ។
ការពន្យល់និងអនុវត្ត៖ពេត្រុសបានដកស្រង់ខទាំងនេះចេញពីអេសាយ ៤០:៦-៨ ដែលបង្ហាញអំពីគុណភាពខុសរវាងជីវិតមនុស្សដែលមានបាបនិងព្រះបន្ទូលរបស់ព្រះ។ ជីវិតមនុស្សទាំងអស់នឹងរលាយបាត់ទៅ ប៉ុន្តែព្រះបន្ទូលនឹងជាប់នៅអស់កល្បជានិច្ច។ ព្រះបរិសុទ្ធ មានអំណាចលើគ្រប់ទាំងអស់ និងគង់នៅតាំងពីអស់កល្បរហូតអស់កល្ប។ ព្រះបន្ទូលរបស់ទ្រង់ឆ្លុះឲ្យឃើញពីលក្ខណៈសម្បត្តិរបស់ទ្រង់។ ដូច្នេះ បើទ្រង់គង់នៅជានិច្ច នោះព្រះបន្ទូលរបស់ទ្រង់ក៏គង់នៅជានិច្ចដែរ។ ទ្រង់ប្រើព្រះបន្ទូលបង្កើត ទំនាក់ទំនង ជំនុំជំរះ អត់ទោស បង្កើតជាថ្មី និងបំផ្លាញ។ លើសពីនេះ ទ្រង់ប្រើព្រះបន្ទូលដ៏ជាប់នៅជានិច្ចរបស់ទ្រង់ ជាទឹកដោះសុទ្ធខាងព្រលឹងវិញ្ញាណដើម្បីធ្វើឲ្យទំនាក់ទំនងរបស់ទ្រង់នឹងរាស្ត្ររបស់ទ្រង់មានការរីកចំរើន ហើយនោះគឺជាព្រះគម្ពីរដែលគ្រីស្ទបរិស័ទកំពុងមាននោះហើយ។ ដូច្នេះ ក្នុងនាមយើងជាគ្រីស្ទបរិស័ទ តើយើងគួរតែយកចិត្តទុកដាក់ជាមួយព្រះគម្ពីរបែបយ៉ាងណាទៅ?
សូមអាន ២:១–៣។ ដើម្បីឲ្យគ្រីស្ទបរិស័ទបានរីកចំរើនទ្បើងដរាបដល់បានសង្គ្រោះ ហើយដើម្បីឲ្យដឹងថា ព្រះអម្ចាស់ទ្រង់ល្អមែន តើពេត្រុសលើកទឹកចិត្តឲ្យគ្រីស្ទបរិស័ទខិតខំធ្វើអ្វី?
តើអ្នកចង់សង្វាតរកទឹកដោះខាងព្រលឹងវិញ្ញាណដែរឬទេ? តើអ្នកគួរតែផ្លាស់ប្តូរអ្វីនៅក្នុងជីវិត ប្រសិនបើអ្នកចង់សង្វាតរកទឹកដោះខាងវិញ្ញាណនោះ?
រំលឹកទ្បើងវិញ៖ តើអ្នកបានរៀនអ្វីខ្លះចេញពីបទគម្ពីរ ១ពេត្រុស ១:១៣–២:៣ នេះ?
Leave a Reply