យ៉ូហាន ១៦:៥-១៥
ការរំលឹក៖ នៅក្នុងយ៉ូហាន ១៥:១៨-១៦:៤ យើងបានរៀនអំពីទំនាក់ទំនងដ៏ជិតស្និទ្ធរវាងព្រះយេស៊ូវនិងពួកសិស្សរបស់ទ្រង់។ មានការប្រយុទ្ធរវាងភាគីពីរ ដែលព្រះយេស៊ូវនិងពួកសិស្សរបស់ទ្រង់រួមគ្នានៅភាគីម្ខាង ហើយលោកិយនៅភាគីម្ខាងទៀត។ មនុស្សលោកស្អប់ព្រះគ្រីស្ទនិងពួកគ្រីស្ទបរិស័ទ ដូច្នេះ ពួកគេក៏នឹងបៀតបៀនយើងផងដែរ អញ្ចឹងហើយបានជាយើងត្រូវស្តាប់ការព្រមានរបស់ព្រះយេស៊ូវ។ ឥឡូវនេះមនុស្សលោកគ្មានអ្វីដោះសារសំរាប់អំពីបាបរបស់ពួកគេឡើយ។ គេមានទោស ពីព្រោះគេបដិសេធព្រះជាម្ចាស់ ហើយមិនស្គាល់ព្រះជាម្ចាស់ទេ ទោះបីជាព្រះអង្គបានសំដែងអង្គទ្រង់តាមរយៈព្រះយេស៊ូវក៏ដោយ។ តួនាទីមួយដ៏សំខាន់របស់ព្រះវិញ្ញាណបរិសុទ្ធគឺ ដើម្បីធ្វើបន្ទាល់អំពីព្រះយេស៊ូវ។
សូមអានយ៉ូហាន ១៦:៥-១៥ ទាំងមូល។
ចូរអានខ.៥-១១ ទ្បើងវិញ ហើយឆ្លើយសំនួរខាងក្រោម។
តើ កាលណាព្រះវិញ្ញាណបរិសុទ្ធយាងមកដល់ ព្រះអង្គនឹងបញ្ជាក់អោយមនុស្សលោកដឹងអំពីអ្វី (មានបីចំណុច)?
ការពន្យល់៖ ព្រះយេស៊ូវធ្វើបន្ទាល់ពីលោកិយថា អំពើដែលគេប្រព្រឹត្តសុទ្ធតែអាក្រក់ (៧:៧)។ ដូច្នេះហើយបានជាលោកិយស្អប់ព្រះយេស៊ូវ។ ព្រះវិញ្ញាណបរិសុទ្ធធ្វើបន្ទាល់អំពីលោកិយដូចគ្នាដែរថា អំពើដែលគេប្រព្រឹត្តសុទ្ធតែអាក្រក់។ នៅពេលព្រះវិញ្ញាណបរិសុទ្ធនឹងបញ្ជាក់អោយមនុស្សលោកដឹងថា គេយល់ខុសអំពីបាប អំពីសេចក្ដីសុចរិត និងអំពីការកាត់ទោស ហើយការបញ្ជាក់នេះនឹងនាំមនុស្សខ្លះប្រែចិត្តទទួលសេចក្ដីសង្គ្រោះ ហើយនាំអ្នកខ្លះទៀតមានចិត្តរឹងរូសវិញ។
ពិភពលោកនេះមិនមានការយល់ដឹងពិតប្រាកដអំពីអំពើបាបនោះទេ ប៉ុន្តែព្រះវិញ្ញាណបរិសុទ្ធនឹងបង្ហាញអោយមនុស្សដឹងថា ពួកគេគឺជាមនុស្សមានបាប ពីព្រោះគេគ្មានសេចក្តីជំនឿលើអង្គព្រះគ្រីស្ទ។ ការវិនិច្ឆ័យរបស់ព្រះយេស៊ូវតែងតែមានសេចក្តីសុចរិតនិងយុត្តិធម៌ (៥:៣០; ៨:១៦) ប៉ុន្តែលោកិយបានវិនិច្ឆ័យយ៉ាងខុស (៧:២៤) ពីព្រោះគេស្ដាប់តាមមារសាតាំង ដែលជាឪពុកនៃសេចក្ដីកុហក។ ប៉ុន្តែឥឡូវនេះ ចៅហ្វាយរបស់លោកិយនេះ គឺមារសាតាំង ត្រូវទោសហើយ។
ការអនុវត្ត៖ តាមរយៈព្រះវិញ្ញាណបរិសុទ្ធ ពួកគ្រីស្ទបរិស័ទនឹងថ្លែងទីបន្ទាល់អំពីសេចក្ដីពិតទាំងនេះផងដែរ។ របៀបមួយដែលព្រះវិញ្ញាណបរិសុទ្ធបញ្ជាក់អោយមនុស្សលោកដឹងថា គេយល់ខុសអំពីបាប អំពីសេចក្ដីសុចរិត និងអំពីការកាត់ទោស គឺតាមរយៈគ្រីស្ទបរិស័ទថ្លែងទីបន្ទាល់អំពីបាបរបស់លោកិយ ដោយអំណាចដែលមកពីព្រះវិញ្ញាណបរិសុទ្ធ។ នេះហើយជាអ្វីដែលពួកសិស្សបានធ្វើបន្ទាប់ពីបុណ្យថ្ងៃទី៥០ (កិច្ចការ ២:២៣; ៣:១៣-១៥; ៤:៨-១០)។ វាជាការមិនគោរពដល់ព្រះយេស៊ូវឬព្រះវិញ្ញាណបរិសុទ្ធទេ បើយើងបរាជ័យក្នុងការថ្លែងទីបន្ទាល់អំពីអំពើបាបនោះ។ លើសពីនេះទៀត យើងមិនត្រឹមតែថ្លែងទីបន្ទាល់អំពីអំពើបាបរបស់ពិភពលោកតាមរយៈពាក្យសម្ដីរបស់យើងប៉ុណ្ណោះទេ ប៉ុន្តែក៏ដោយការរស់នៅក្នុងជីវិតដ៏បរិសុទ្ធ ដែលបង្ហាញអោយគេដឹងថា ព្រះវរបិតា ព្រះរាជបុត្រា និងព្រះវិញ្ញាណបរិសុទ្ធបានផ្លាស់ប្តូរជីវិតរបស់យើងហើយ ដូច្នេះការថ្លែងទីបន្ទាល់តាមរយៈពាក្យសម្ដីនិងជីវិតដ៏បរិសុទ្ធ យើងកំពុងបង្ហាញថា ពិភពលោកកំពុងរស់នៅក្នុងអំពើបាប។
ពីមុនយើងឃើញថា មនុស្សលោកបានស្អប់ព្រះយេស៊ូវ ប៉ុន្តែមុនពេលយើងបានជឿលើព្រះយេស៊ូវ យើងក៏បាននៅខាងលោកិយផងដែរ។ បើអញ្ចឹង តើហេតុអ្វីបានជាយើងបានជឿលើព្រះយេស៊ូវ? បទគម្ពីរនេះបានផ្តល់ ចំលើយខ្លះ។ ព្រះវិញ្ញាណបរិសុទ្ធបានជួយនាំយើងអោយជឿ ដោយបញ្ជាក់អោយយើងដឹងថា ពីមុនយើងបានយល់ខុសអំពីបាប អំពីសេចក្ដីសុចរិត និងអំពីការកាត់ទោស។ គ្រីស្ទបរិស័ទពិតប្រាកដដឹងថា លោកិយនេះស្ថិតនៅទីតាំងដ៏គ្រោះថ្នាក់មួយ គឺគេនឹងវិនាស បើគេមិនជឿលើព្រះយេស៊ូវ។ បើមនុស្សម្នាក់មិនយល់អំពីសេចក្ដីពិតនេះ នោះជាភស្តុតាងបង្ហាញថា គេមិនមានជំនឿពិតប្រាកដ ហើយគ្មានព្រះវិញ្ញាណបរិសុទ្ធគង់នៅជាមួយគេទេ។
ចូរអាន ខ.១២-១៥ ។
តាមរយៈបទគម្ពីរនេះ តើព្រះវិញ្ញាណបរិសុទ្ធមានតួនាទីអ្វីខ្លះ?
ការពន្យល់៖ «គ្រប់ទាំងសេចក្តីពិត» សំដៅលើសេចក្ដីពិតអំពីព្រះយេស៊ូវ។
សេចក្ដីដែលព្រះយេស៊ូវបង្រៀនមិនមែនជារបស់ព្រះយេស៊ូវផ្ទាល់ទេ តែចេញពីព្រះវរបិតាវិញ (៧:១៦) ហើយនៅទីនេះយើងឃើញថា ព្រះវិញ្ញាណបរិសុទ្ធនឹងមានបន្ទូលដោយមិនអាងអង្គទ្រង់ (ព្រះវិញ្ញាណបរិសុទ្ធ) ទេ គឺនឹងមានបន្ទូលចំពោះតែសេចក្តីណា ដែលទ្រង់ឮពីព្រះវរបិតានិងព្រះរាជបុត្រាវិញ។ ពួកសិស្សបានស្តាប់ការបង្រៀនរបស់ព្រះយេស៊ូវអស់រយៈពេលបីឆ្នាំហើយ ឥឡូវនេះព្រះអង្គនឹងចាកចេញពីពួកគេទៅ ប៉ុន្តែព្រះវិញ្ញាណបរិសុទ្ធនឹងបន្តក្នុងការប្រទានការបង្រៀនរបស់ព្រះយេស៊ូដល់ពួកគេ។ តួនាទីរបស់ព្រះរាជបុត្រាគឺ ដើម្បីដំកើងព្រះវរបិតា ហើយតួនាទីរបស់ព្រះវិញ្ញាណបរិសុទ្ធគឺ ដើម្បីដំកើងព្រះរាជបុត្រា។
ការអនុវត្ត៖ មនុស្សខ្លះស្វែងរកព្រះវិញ្ញាណបរិសុទ្ធ ដោយព្រោះគេចង់បានបទពិសោធន៍ពិសេសអស្ចារ្យ ប៉ុន្តែនេះមិនមែនជាការជំរុញដ៏ល្អទេ។ យើងត្រូវស្វែងរកព្រះវិញ្ញាណបរិសុទ្ធប្រយោជន៍អោយយើងនឹងស្គាល់ព្រះគ្រីស្ទនិងលើកតម្កើងព្រះគ្រីស្ទ។ បទពិសោធដ៏អស្ចារ្យមិនមែនជាភស្តុតាងដែលបង្ហាញថា មនុស្សម្នាក់មានព្រះវិញ្ញាណបរិសុទ្ធទេ។ មារសាតាំងអាចធ្វើការអស្ចារ្យផងដែរ។ ព្រះវិញ្ញាណបរិសុទ្ធគឺជាព្រះវិញ្ញាណនៃសេចក្តីពិតហើយអស់អ្នកដែលមានព្រះវិញ្ញាណបរិសុទ្ធជឿតាមសេចក្ដីពិត ដែលសំដែងមកក្នុងព្រះបន្ទូល ហើយលើកតម្កើងព្រះគ្រីស្ទ។
រំលឹកទ្បើងវិញ៖ តើយើងបានរៀនអ្វីអំពីព្រះវិញ្ញាណបរិសុទ្ធ ចេញពីយ៉ូហាន ១៦:៥–១៥?
ការអនុវត្ត៖ តាមអ្វីដែលអ្នកបានរៀនតាមរយៈបទគម្ពីរនេះ តើអ្នកត្រូវយកវាមកអនុវត្តយ៉ាងដូចម្តេចនាពេលសព្វថ្ងៃនេះ?
Leave a Reply