Josh.2 Rahab and the spies pdf download
កាលៈទេសៈប្រវត្តិសាស្ត្រ
អ៊ីស្រាអែលបានបញ្ចប់ការវង្វេងនៅក្នុងវាលរហោស្ថានអស់រយៈពេល៤០ឆ្នាំដោយព្រោះតែការមិនស្តាប់បង្គាប់របស់ពួកគេហើយ យ៉ូស្វេបានជំនួសម៉ូសេ ធ្វើជាអ្នកដឹកនាំអ៊ីស្រាអែល ហើយពួកគេកំពុងហៀបនឹងឆ្លងទន្លេយ័រដាន់ ចូលទៅក្នុងទឹកដី សន្យា។ ទីក្រុងយេរីខូរគឺជាទីកន្លែងតាំងទីលំនៅមួយ ចាប់តាំងពីសម័យដំបូងបំផុតមកម៉្លេះ។ ទីក្រុងនេះត្រូវបានសាងសង់នៅលើភ្នំមួយ ហើយមានប៉មនិងកំផែងជាច្រើនការពារ ដូច្នេះវាបាំងផ្លូវរបស់អ៊ីស្រាអែលចូលទៅក្នុងទឹកដីសន្យា។ ការចាប់យកទីក្រុងយេរីខូរគឺជាគោលបំណងទីមួយនៃយុទ្ធនាការរបស់យ៉ូស្វេ។
នៅក្នុងលោកុប្បត្ដិ ១២ ព្រះបានសន្យាប្រទានទឹកដីកាណានដល់ពូជពង្សរបស់អ័ប្រាហាំ។ នៅមុនពេលជនជាតិអ៊ីស្រាអែលបានចាប់យកទឹកដីនេះ មនុស្សដែលបានរស់នៅទីនោះ គឺជាមនុស្សអាក្រក់នៅចំពោះព្រះ ត្រូវបណ្តាសា និងស្ថិតនៅក្រោមការជំនុំជំរះរបស់ព្រះ ហើយរៀបនឹងទទួលទណ្ឌកម្មរបស់ព្រះ តាមរយៈជនជាតិអ៊ីស្រាអែលបំផ្លាញពួកគេ។ ស្ថានភាពទាំងនេះមានសារៈសំខាន់ ជួយយើងអោយយល់អំពីអ្វី ដែលយើងគួរតែបង្កើតសារនៃសេចក្តីអធិប្បាយរបស់យើង។
សារនៃសេចក្តីអធិប្បាយ
គួរអោយសោកស្តាយ ពេលខ្លះនៅពេលមនុស្សអានរឿងអំពីនាងរ៉ាហាប ពួកគេគ្រាន់តែអនុវត្តរឿងនោះដោយមើលទៅលើអន្តរកម្មរវាងមនុស្ស ហើយមិនយល់អំពីស្ថានភាពប្រវត្តិសាស្ត្រ និងអ្វីដែលរឿងនេះកំពុងបង្រៀនអំពីព្រះឡើយ។
តើរឿងនៅក្នុងយ៉ូស្វេជំពូក ២ ទាក់ទងនឹងយើងយ៉ាងដូចម្តេចនៅសព្វថ្ងៃនេះ?
ទីមួយ យើងត្រូវតែពិចារណាអំពីស្ថានភាពសម្រាប់មនុស្សនៅក្នុងទីក្រុងយេរីខូរដូចជាស្ថានភាពសំរាប់មនុស្សនៅក្នុងពិភពលោកសព្វថ្ងៃនេះដោយរបៀបណា។
មនុស្សនៅក្នុងទីក្រុងយេរីខូរបានបះបោរប្រឆាំងនឹងព្រះ ស្ថិតនៅក្រោមការជំនុំជំរះរបស់ទ្រង់ ហើយព្រះរៀបនឹងបំផ្លាញពួកគេ តាមរយៈឧបករណ៍ទណ្ឌកម្មរបស់ទ្រង់សម្រាប់ពួកគេ ដែលជាជនជាតិអ៊ីស្រាអែល។ ហើយស្ថានភាពសំរាប់មនុស្សនៅក្នុងពិភពលោកសព្វថ្ងៃនេះគឺដូចគ្នា គឺពួកគេបានបះបោរប្រឆាំងនឹងព្រះ ពួកគេស្ថិតក្រោមការជំនុំជំរះរបស់ទ្រង់ ហើយព្រះនឹងបំផ្លាញពួកគេ តាមរយៈឧបករណ៍ទណ្ឌកម្មរបស់ទ្រង់សម្រាប់ពួកគេ ដែលជាព្រះយេស៊ូវ នៅពេលដែលទ្រង់យាងត្រឡប់មកវិញ។
ជាការសំខាន់ ដែលអ្នកស្តាប់របស់យើងយល់ថា នេះគឺជាស្ថានភាពរបស់ពិភពលោកសព្វថ្ងៃនេះ ដូច្នេះ ពិភពលោកក៏កំពុងស្ថិតក្នុងស្ថានភាពដូចគ្នានឹងមនុស្សនៅទីក្រុងយេរីខូរផងដែរ។
នៅពេលដែលអ៊ីស្រាអែលហៀបនឹងចូលទៅក្នុងទឹកដីសន្យា យើងមានសំនួរធំៗរួមមាន «តើមនុស្ស ដែលស្ថិតនៅក្រោមការជំនុំជំរះរបស់ព្រះនៅក្នុងទឹកដីកាណាន មានសេចក្តីសង្ឃឹមណាដែរឬទេ? តើពួកគេទាំងអស់នឹងត្រូវបានបំផ្លាញ ឬមានផ្លូវមួយដែលពួកគេអាចបានសង្គ្រោះចេញពីការជំនុំជំរះរបស់ព្រះបាន?
រឿងអំពីនាងរ៉ាហាបប្រាប់យើងថា មានសេចក្តីសង្ឃឹមសម្រាប់ពួកគេ គឺមានផ្លូវមួយ ដើម្បីបានសង្គ្រោះចេញពីការជំនុំជំរះរបស់ព្រះ។
នាងរ៉ាហាបនិងគ្រួសាររបស់នាងបានសង្គ្រោះចេញពីការជំនុំជំរះរបស់ព្រះ។ ដោយរបៀបណា? មិនមែនដោយសារសេចក្តីល្អផ្ទាល់ខ្លួនរបស់នាងឡើយ ពីព្រោះនាងគឺជាស្ត្រីពេស្យាម្នាក់។ នាងបានសង្គ្រោះ ដោយព្រោះនាងបានលឺដំណឹង អំពីអ្វីដែលព្រះបានកំពុងធ្វើសម្រាប់អ៊ីស្រាអែល ហើយនាងបានជឿអ្វីដែលនាងបានលឺ ហើយនាងមិនបានចូលរួមជាមួយប្រជាជននៅក្នុងទីក្រុងយេរីខូររបស់នាង ដែលនឹងត្រូវវិនាសនោះទេ តែនាងបានសំរេចចិត្តថា នាងចង់ចូលរួមជាមួយភាគីរបស់ព្រះ (ហេព្រើរ ១១:៣១)។
ស្ថានភាពគឺដូចគ្នានៅសព្វថ្ងៃនេះ។ មនុស្សនៅក្នុងពិភពលោក ដែលនៅក្រោមការជំនុំជំរះរបស់ព្រះនិងត្រូវវិនាស អាចគេចចេញពីការជំនុំជំរះរបស់ព្រះបាន ដោយការស្តាប់លឺដំណឹងល្អនៃសេចក្តីសង្គ្រោះ តាមរយៈព្រះយេស៊ូវ ហើយដាក់ការទុកចិត្តរបស់ពួកគេលើទ្រង់។ ដូចជានាងរ៉ាហាបផងដែរ យើងមិនបានសង្គ្រោះ ដោយសារការប្រព្រឹត្តល្អរបស់យើងឡើយ គឺយើងបានសង្គ្រោះដោយសារសេចក្តីជំនឿវិញ។ ប៉ុន្តែ សារដែលនាងរ៉ាហាបបានស្តាប់លឺនិងជឿ គឺជាអ្វីដែលព្រះបានកំពុងធ្វើសម្រាប់អ៊ីស្រាអែល រីឯសារដែលយើងស្តាប់លឺនិងជឿ គឺជាអ្វីដែលព្រះបានធ្វើសម្រាប់យើងតាមរយៈព្រះយេស៊ូវ ដើម្បីសង្គ្រោះយើង។
ដូច្នេះ ការអនុវត្តសំខាន់មួយចេញពីរឿង និងសារសំខាន់សម្រាប់សេចក្តីអធិប្បាយរបស់យើងគឺ ត្រូវទុកចិត្តលើព្រះយេស៊ូវ ដើម្បីសង្គ្រោះយើងចេញពីសេចក្តីក្រោធដែលនឹងមកដល់។
រឿងនៅក្នុងយ៉ូស្វេជំពូក ២ មានប្រយោជន៍បញ្ជាក់ចំនុចនេះពីរយ៉ាង។ ទីមួយ ចូរស្រមៃថា ព្រះបានមានបន្ទូលថា ទ្រង់នឹងបំផ្លាញទីក្រុងភ្នំពេញ ដោយព្រោះសេចក្តីអាក្រក់របស់ទីក្រុងនេះ ប៉ុន្តែទ្រង់នឹងសង្គ្រោះមនុស្សម្នាក់។ តើអ្នកនឹងរំពឹងអោយមនុស្សម្នាក់នោះជាអ្នកណា? មនុស្សភាគច្រើននឹងគិតថា បើសិនព្រះសង្គ្រោះមនុស្សម្នាក់មែន នោះមនុស្សម្នាក់នោះត្រូវតែជាមនុស្សម្នាក់យ៉ាងល្អ ហើយពួកគេមិនរំពឹងថា មនុស្សម្នាក់នោះគឺជាស្ត្រីពេស្យាឡើយ។ ដូច្នេះ រឿងនេះបញ្ជាក់យ៉ាងច្បាស់លាស់អំពីសេចក្តីសង្គ្រោះ ដោយសារសេចក្តីជំនឿ មិនមែនដោយការប្រព្រឹត្ត ហើយវាក៏បង្ហាញផងដែរថា នាងរ៉ាហាបបានសំដែងសេចក្តីជំនឿរបស់នាងតាមរយៈការប្រព្រឹត្ត ដោយជួយពួកអ្នកស៊ើបការណ៍។
ទីពីរ រឿងនេះគឺជាផ្នែកមួយនៃប្រវត្តិសាស្ត្រ ដែលបង្ហាញថា ព្រះពិតជានាំមកនូវការបំផ្លាញនិងសេចក្តីសង្គ្រោះមែន។ មនុស្សនៅសព្វថ្ងៃនេះមិនជឿថា ព្រះយេស៊ូវនឹងយាងត្រឡប់មកវិញ បំផ្លាញលោកិយ ហើយនិងជំនុំជំរះមនុស្សទាំងអស់នោះឡើយ។ ប៉ុន្តែយើងត្រូវតែក្រឡេកមើលប្រវត្តិសាស្ត្រម្តងទៀត។ ព្រះបានមានបន្ទូលថា ទ្រង់នឹងបំផ្លាញទីក្រុងយេរីខូរ ហើយទ្រង់បានធ្វើដូច្នោះមែន (ជំពូក ៦)។ សព្វថ្ងៃនេះ យើងមានព្រះបន្ទូលរបស់ព្រះ ដែលប្រកាសថា ព្រះយេស៊ូវនឹងយាងត្រឡប់មកវិញ ដើម្បីនាំមកនូវទណ្ឌកម្ម ការបំផ្លាញ និងសេចក្តីសង្គ្រោះ ហើយទ្រង់នឹងធ្វើការនេះ។ ប្រវត្តិសាស្ត្រគឺជាភស្តុតាងបញ្ជាក់ថា ព្រះរក្សាតាមព្រះបន្ទូលរបស់ទ្រង់ ហើយយើងត្រូវតែសង្កត់ធ្ងន់លើសេចក្តីពិតនេះនៅក្នុងសាររបស់យើង នៅពេលយើងប្រកាសព្រះបន្ទូលរបស់ព្រះ ហើយទទូចអោយមនុស្សបានទុកចិត្តលើព្រះយេស៊ូវ។
ទំនាក់ទំនងច្បាស់លាស់មួយទៀតទៅនឹងព្រះគ្រីស្ទគឺថា នាងរ៉ាហាបត្រូវបានចុះបញ្ជីជាបុព្វបុរសរបស់ព្រះគ្រីស្ទ (ម៉ាថាយ ១:៥) ដែលបង្ហាញអំពីព្រះគុណដ៏អស្ចារ្យរបស់ព្រះ ដែលទ្រង់បានប្រើនាងនៅក្នុងខ្សែស្រឡាយ ដែលនាំទៅដល់ព្រះយេស៊ូវ។
Leave a Reply