Daniel Intro pdf download
សារៈសំខាន់នៃកណ្ឌដានីយ៉ែល Importance of Daniel
កណ្ឌដានីយ៉ែលមានសារៈសំខាន់ខ្លាំងណាស់ពីព្រោះកណ្ឌនេះបានប្រកាសព្រះរាជសារជាច្រើន ដែលមានសារៈសំខាន់ខ្លាំងសំរាប់ព្រះគម្ពីរសញ្ញាថ្មី សំរាប់ការយល់ដឹងអំពីពាក្យថា «កូនមនុស្ស» និងកណ្ឌវិវរណៈ។
កាលៈទេសៈតាមប្រវត្តិសាស្ត្រនៅសម័យដានីយ៉ែលនិងខ្លឹមសារនៃប្រសាសន៍របស់ដានីយ៉ែល Historical background to Daniel and basic message
ដានីយ៉ែលនិងមិត្តភក្ដិរបស់គាត់គឺជាសាសន៍យូដាដែលបានរស់នៅក្នុងគ្រានិរទេស។ នៅពេលពួកគេស្ថិតក្នុងវ័យជាបុរសវ័យក្មេង ពួកគេត្រូវបានចាប់ខ្លួនទៅ ក្នុងកំឡុងការវាយប្រហារលើទីក្រុងយេរូសាឡិម ដោយយកទៅរស់នៅឯស្រុកបាប៊ីឡូនក្នុងឆ្នាំ៥៩៧មុនគ.ស។ នៅទីនោះពួកគេបានទទួលការហ្វឹកហ្វឺននៅក្នុងព្រះរាជវាំងរបស់ស្តេចនេប៊ូក្នេសា ប៉ុន្តែពួកគេបានបដិសេធមិនអនុញ្ញាតអោយសេចក្តីជំនឿរបស់ពួកគេប្រឡាក់ប្រឡូកជាមួយសេចក្តីជំនឿរបស់ពួកបាប៊ីឡូនឡើយ។
កណ្ឌនេះប្រាប់អំពីរបៀប ដែលព្រះការពារដានីយ៉ែលនិងមិត្តភក្ដិរបស់គាត់នៅក្នុងស្ថានភាពលំបាកៗ រួមទាំងគុកភ្លើងដែលឆេះយ៉ាងសន្ធៅនិងរូងសត្វតោផងដែរ។ ដានីយ៉ែលបានក្លាយជាអ្នកដឹកនាំទាំងនៅក្នុងចក្រភពបាប៊ីឡូននិងចក្រភពពើស៊ី គឺដូចទៅនឹងយ៉ូសែបដែលបានក្លាយជានាយករដ្ឋមន្ត្រីនៃប្រទេសអេស៊ីព្ទផងដែរ។
ពួកយូដាបានសួរនូវសំនួរធំៗអំពីជ័យជំនះរបស់បាប៊ីឡូនលើពួកគេ។ ពួកយូដាបានគិតថា ព្រះរបស់ពួកគេមានគ្រប់ទាំងអំណាច ហើយនឹងតែងតែការពារពួកគេជានិច្ច។ តើព្រះរបស់ពួកគេនៅតែគ្រប់គ្រងឬអត់? តើពួកគេគួរតែតស៊ូក្នុងការថ្វាយបង្គំព្រះរបស់អ៊ីស្រាអែលទៀតដែរទេ ឬពួកគេគួរតែបោះបង់ចោល ហើយចូលរួមជាមួយពួកបាប៊ីឡូននៅក្នុងការថ្វាយបង្គំព្រះរបស់ពួកបាប៊ីឡូនឬយ៉ាងណា?
ផ្នែកទីពីរនៃកណ្ឌនេះបរិយាយអំពីនិមិត្តចំឡែកៗរបស់ដានីយ៉ែល។ និមិត្តទាំងនោះពិពណ៌នាអំពីការរីកចម្រើននិងការធ្លាក់ចុះរបស់ចក្រភពទាំងនោះ និងជ័យជំនះជាចុងក្រោយរបស់ព្រះតាមរយៈការតាំងអាណាចក្ររបស់ទ្រង់ ដែលស្ថិតស្ថេរជារៀងរហូត។
គម្រោង Outline
ដានីយ៉ែលនិងមិត្តភក្ដិទាំងបីនាក់នៅព្រះរាជវាំងរបស់ពួកបាប៊ីឡូន (១:១-៦:២៨)
និមិត្តនិងសុបិន្ដរបស់ដានីយ៉ែល (៧:១-១២:១៣)
របៀបអានកណ្ឌដានីយ៉ែល How to read Daniel
ដើម្បីយល់និងអនុវត្តកណ្ឌដានីយ៉ែលអោយបានត្រឹមត្រូវ សំខាន់យើងត្រូវយល់កណ្ឌនេះនៅក្នុងបរិបទដើមរបស់វានៅក្នុងប្រវត្តិសាស្ត្រ និងនៅក្នុងបរិបទនៃព្រះគម្ពីរទាំងមូល។ ដើម្បីយល់បែបនេះបាន យើងត្រូវឆ្លើយនឹងសំនួរប្រាំមួយដូចខាងក្រោម។
១. តើកណ្ឌដានីយ៉ែលទាក់ទងនឹងកណ្ឌផ្សេងៗទៀតដែលមានក្នុងព្រះគម្ពីរមុនកណ្ឌនេះយ៉ាងដូចម្តេច?
២. តើគោលបំណងរបស់កណ្ឌដានីយ៉ែលសំរាប់អ្នកអានដើមដំបូងក្នុងសម័យព្រះគម្ពីរសញ្ញាចាស់គឺជាអ្វី?
៣. តើកណ្ឌដានីយ៉ែលទាក់ទងនឹងកណ្ឌផ្សេងៗទៀតដែលមានក្នុងព្រះគម្ពីរបន្ទាប់ពីកណ្ឌនេះយ៉ាងដូចម្តេច?
៤. តើកណ្ឌនេះបង្រៀនយើងអ្វីខ្លះអំពីព្រះជាម្ចាស់?
៥. តើកណ្ឌនេះបង្រៀនយើងអ្វីខ្លះអំពីមនុស្ស?
៦. តើកណ្ឌនេះអនុវត្តមកកាន់គ្រីស្ទបរិស័ទសព្វថ្ងៃយ៉ាងដូចម្តេច?
១. តើកណ្ឌដានីយ៉ែលទាក់ទងនឹងកណ្ឌផ្សេងៗទៀតដែលមានក្នុងព្រះគម្ពីរមុនកណ្ឌនេះយ៉ាងដូចម្តេច?
ព្រះគម្ពីរគឺជារឿងធំមួយ ដែលពន្យល់អំពីផែនការរបស់ព្រះចាប់តាំងពីការបង្កបង្កើតដល់ការបង្កបង្កើតថ្មី។ ដំបូងទ្រង់បានបង្កើតសព្វគ្រប់យ៉ាងល្អ ដោយមានអ័ដាម និងអេវ៉ានៅក្នុងសួនច្បារអេដែន។ ពួកគេគឺជារាស្ត្ររបស់ព្រះ នៅក្នុងទីកន្លែងរបស់ព្រះ ក្រោមការគ្រប់គ្រង និងព្រះពររបស់ព្រះ។ នេះគឺជាគោលដៅរបស់ព្រះសំរាប់ការបង្កបង្កើត។ ពួកគេ មិនបានស្តាប់បង្គាប់ ហើយត្រូវបានបណ្តេញចេញពីសួនច្បារ ដែលជាទីបរិសុទ្ធរបស់ព្រះ។ កន្លែងផ្សេងៗទាំងអស់ទៀតក្នុងព្រះគម្ពីរនិយាយអំពីផែនការរបស់ព្រះ ក្នុងការសង្គ្រោះមនុស្សចេញពីលទ្ធផលនៃការបះបោរនេះ ហើយស្តានគររបស់ទ្រង់ឡើងវិញ ដែលជារាស្ត្ររបស់ព្រះ នៅក្នុងទីកន្លែងរបស់ព្រះ ក្រោមការគ្រប់គ្រងនិងព្រះពររបស់ព្រះ។ ដូច្នេះ ព្រះបានជ្រើសរើសអ័ប្រាហាំ ហើយបានសន្យាថា ទ្រង់នឹងធ្វើអោយគាត់ក្លាយជាជាតិសាសន៍មួយដ៏ធំ ហើយពួកគេនឹងទទួលបានទឹកដីសន្យា។ តាមរយៈពូជពង្សរបស់អ័ប្រាហាំ ព្រះនឹងប្រទានពរដល់លោកិយ (លោកុប្បត្ដិ ១២:៣)។ ពួកគេត្រូវតែជារាស្ត្ររបស់ព្រះ នៅក្នុងទីកន្លែងរបស់ព្រះ ក្រោមការគ្រប់គ្រងនិងព្រះពររបស់ព្រះ ។ ទ្រង់នឹងគង់ក្នុងចំណោមពួកគេ ដូច្នេះអ៊ីស្រាអែលនៅក្នុងទឹកដីសន្យាគឺ អេដែនថ្មី ដែលជាទីបរិសុទ្ធថ្មី (សូមមើល លោកុប្បត្ដិ ១៣:១០)។ ព្រះបានមានបន្ទូលនៅក្នុងនិក្ខមនំ ១៩:៤-៦ ថា ទ្រង់បានជ្រើសរើសអ៊ីស្រាអែលធ្វើជារាស្ត្រពិសេសរបស់ទ្រង់ ហើយក្នុងចោទិយកថា ៤ ចែងថា ពួកគេត្រូវធ្វើជាពន្លឺដល់ជាតិសាសន៍ដទៃទាំងអស់។ ចោទិយកថា ២៨ បានប្រកាសបណ្តាសារបស់សម្ព័ន្ធមេត្រីថា បើសិនអ៊ីស្រាអែលមិនស្មោះត្រង់ចំពោះព្រះ និងធ្វើតាមការត្រាស់ហៅរបស់ខ្លួនទេ នោះព្រះនឹងបញ្ជូនពួកគេចេញពីទឹកដី។ ការផ្ដាច់សម្ព័ន្ធមេត្រីនិងការថ្វាយបង្គំរូបព្រះនាំទៅដល់ពេលវេលា ដែលអ៊ីស្រាអែលធ្លាក់ចុះ។ ដូច្នេះព្រះជាម្ចាស់បានសម្រេចតាមព្រះបន្ទូលនៅក្នុងចោទិយកថា២៨ ហើយនាំពួកអ៊ីស្រាអែលនិងយូដាចេញពីទឹកដីសន្យា។ ប្រវត្តិសាស្ត្រទាំងនេះនាំអោយមានសំនួរមួយចំនួនដ៏សំខាន់។ តើអ៊ីស្រាអែលនៅតែជារាស្រ្តរបស់ព្រះឬទេ? ចំនុចទាំងនេះមានសារៈសំខាន់ណាស់ ដើម្បីយល់កណ្ឌដានីយ៉ែល។
បញ្ហាធំមួយគឺថា ជារឿយៗមនុស្សអានកណ្ឌដានីយ៉ែលក្នុងពេលសព្វថ្ងៃនេះ ទុកដូចជាជារឿងលើកទឹកចិត្ត (ជាពិសេសនៅក្នុងព្រះគម្ពីរសំរាប់កូនក្មេង) អំពីព្រះធ្វើការដ៏អស្ចារ្យផ្សេងៗ ប៉ុន្តែអ្នកអានមិនយល់អំពីរបៀប ដែលកណ្ឌនេះស៊ីគ្នានឹងផ្ទៃរឿងធំរបស់ព្រះគម្ពីរទាំងមូលឡើយ។ ដានីយ៉ែលនិងមិត្តភក្ដិរបស់គាត់មិនគ្រាន់តែជាមនុស្ស ដែលបានជឿដល់ព្រះជាម្ចាស់ប៉ុណ្ណោះទេ តែពួកគេក៏ជាពូជពង្សរបស់លោកអ័ប្រាហាំផងដែរ។ ពួកគេគឺជាសមាជិកនៃសហគមន៍សម្ព័ន្ធមេត្រីរបស់ព្រះ។ កណ្ឌដានីយ៉ែលបង្ហាញថា ព្រះមិនបានបដិសេធរាស្ត្ររបស់ទ្រង់ទាំងស្រុងឡើយ ពីព្រោះទ្រង់កំពុងការពារដានីយ៉ែលនិងមិត្តភក្តិរបស់គាត់ ដែលពួកគេទាំងអស់គ្នាគឺជាពួកយូដា។ លើសពីនេះ កណ្ឌដានីយ៉ែលបន្តរឿងពីលោកុប្បត្ដិ ៣:១៥ ដែលបានទាយថា នឹងមានសេចក្តីខ្មាំងនឹងគ្នារវាងរាស្ត្ររបស់ព្រះនិងរាស្ត្ររបស់សាតាំង។ លោកិយនឹងគាបសង្កត់រាស្ត្ររបស់ព្រះ ហើយនឹងមាននគរផ្សេងៗនៅក្នុងលោកិយនេះគ្រប់គ្រងមួយរយៈ ប៉ុន្តែព្រះនឹងនៅតែស្មោះត្រង់ចំពោះរាស្ត្ររបស់ទ្រង់ ហើយនឹងបង្កើតនគរអស់កល្បជានិច្ចរបស់ទ្រង់។
២. តើគោលបំណងរបស់កណ្ឌដានីយ៉ែលសម្រាប់អ្នកអានដើមដំបូងក្នុងសម័យព្រះគម្ពីរសញ្ញាចាស់គឺជាអ្វី?
កណ្ឌដានីយ៉ែលបានប្រាប់រាស្ត្ររបស់ព្រះថា ទ្រង់នៅតែគង់នៅជាមួយពួកគេ ហើយការពារពួកគេនៅក្នុងទឹកដីរបស់សាសន៍ដទៃ ហើយ បើទោះជា អាណាចក្ររបស់មនុស្សដូចជា បាប៊ីឡូនមើលទៅដូចជាមានអំណាចខ្លាំង ក៏ព្រះនឹងបំផ្លាញពួកគេ ហើយតាំងនគរអស់កល្បជានិច្ចរបស់ទ្រង់ដែរ។
៣. តើកណ្ឌដានីយ៉ែលទាក់ទងនឹងកណ្ឌផ្សេងៗទៀត ដែលមានក្នុងព្រះគម្ពីរបន្ទាប់ពីកណ្ឌនេះយ៉ាងដូចម្តេច?
មានរបៀបជាច្រើន ដែលកណ្ឌដានីយ៉ែលទាក់ទំនងនឹងកណ្ឌផ្សេងៗ ដែលមានបន្ទាប់ពីវា។ ផ្នែកទីពីរនៃកណ្ឌនេះ ដែលមានបទទំនាយភាគច្រើននៅក្នុងកណ្ឌដានីយ៉ែល បានបើកសំដែងច្រើនទាក់ទងនឹងព្រឹត្តិការណ៍ ដែលនឹងកើតឡើងនៅក្នុងពិភពលោកបន្ទាប់ពីសម័យដានីយ៉ែល។ ទាក់ទងនឹងបទទំនាយនេះ មានសាស្ត្រាចារ្យព្រះគម្ពីរផ្សេងៗបានពិភាក្សាតទល់គ្នាយ៉ាងច្រើន។
ទាំងនេះគឺជាបទទំនាយសំខាន់ៗ ប៉ុន្តែពេលខ្លះគ្រីស្ទបរិស័ទមានការស្មុគស្មាញនិងការមិនឯកភាពគ្នាអំពីការកាត់ស្រាយបទទំនាយទាំងនេះ ដែលយើងព្រងើយកន្តើយចំពោះព្រះរាជសារចំបង៖ ព្រះនឹងសង្គ្រោះរាស្ត្ររបស់ទ្រង់ចេញពីអំពើបាបនិងសេចក្តីវេទនារបស់ពួកគេតាមរយៈការងាររបស់ព្រះមែស៊ី។ មនុស្សអាក្រក់នឹងត្រូវវិនាស ឯមនុស្សសុចរិតនឹងបានព្រះពរពីព្រោះព្រះយេស៊ូវនឹងសោយរាជ្យ។ ការទាំងអស់នេះកើតឡើង មិនមែនដោយសារមនុស្សគ្រប់គ្រងអនាគតរបស់ខ្លួន ឬសមនឹងទទួលសេចក្តីប្រោសលោះរបស់ព្រះនោះទេ ប៉ុន្តែដោយសារព្រះប្រើអំណាចព្រះចេស្ដារបស់ទ្រង់ក្នុងការបង្ហាញសេចក្តីមេត្តាករុណាដល់រាស្ត្ររបស់ទ្រង់ជារៀងរហូត។ ការនេះក៏ជាដំណឹងល្អនៅក្នុងកណ្ឌដានីយ៉ែល ដែលគួរតែផ្តល់អោយយើងនូវភាពក្លាហាននៅចំពោះខ្មាំងសត្រូវរបស់យើង សេចក្តីសង្ឃឹមនៅក្នុងទុក្ខព្រួយរបស់យើង និងការទ្រាំទ្រនៅក្នុងទុក្ខលំបាករបស់យើង។ (បទទំនាយទាំងនេះក៏ផ្តល់សេចក្តីលំអិតអំពីអ្វី ដែលបានកើតឡើងនៅពេលអ្នកដឹកនាំម្នាក់ឈ្មោះ Antiochus Epiphanes បានគ្រប់គ្រងទឹកដីរបស់អ៊ីស្រាអែលនិងប្រទេសជុំវិញចាប់ពីឆ្នាំ១៧៥ដល់១៦៤មុនគ.ស.។)
៤. តើកណ្ឌដានីយ៉ែលបង្រៀនយើងអ្វីខ្លះអំពីព្រះ?
តាមការរៀបរាប់ខាងលើនេះ យើងមើលឃើញថា កណ្ឌដានីយ៉ែលបង្រៀនថា
- ព្រះគ្រប់គ្រងលើទាំងអស់ ។
- ព្រះជាម្ចាស់ប្រទានកិត្តិយសដល់មនុស្សដែលបន្ទាបខ្លួន។
- ព្រះជាម្ចាស់បានសង្គ្រោះរាស្រ្តរបស់ទ្រង់នៅក្នុងស្ថានភាពលំបាក។
- ព្រះទ្រង់មានបន្ទូលមកកាន់រាស្ត្ររបស់ទ្រង់ ហើយពន្យល់អំពីផែនការរបស់ទ្រង់សំរាប់លោកិយ។
- ពិភពលោកនេះជាញឹកញាប់គាបសង្កត់ប្រជាជនរបស់ព្រះ។
- មេដឹកនាំជាញឹកញាប់មានសេចក្តីអំនួតខ្លាំង។
- ព្រះការពារមនុស្សពីរបីនាក់ ដែលស្មោះត្រង់។
៥. តើកណ្ឌនេះបង្រៀនយើងអ្វីខ្លះអំពីមនុស្ស?
៦. តើកណ្ឌនេះអនុវត្តមកកាន់គ្រីស្ទបរិស័ទសព្វថ្ងៃយ៉ាងដូចម្តេច?
កណ្ឌដានីយ៉ែលទាក់ទងនឹងជីវិតរបស់យើងនៅសព្វថ្ងៃនេះនៅក្នុងរបៀបជាច្រើន។
១. ជាដំបូង យើងត្រូវតែមើលឃើញថាកណ្ឌដានីយ៉ែលទាក់ទងនឹងជីវិតរបស់យើងតាមរយៈព្រះយេស៊ូវ។ គ្រប់ទំនាយនិងសេចក្តីសន្យាទាំងអស់អំពីព្រះយេស៊ូវ ដែលបានលើកឡើងនៅចំណងជើងទី៣ខាងលើ បង្ហាញអំពីរបៀបដែលកណ្ឌដានីយ៉ែលមានការអនុវត្តចំពោះយើង។ យើងមានសេចក្តីសង្ឃឹមនិងសេចក្តីសង្គ្រោះតាមរយៈព្រះយេស៊ូវ ដែលជាបុត្រារបស់ស្តេចដាវីឌ ដែលគ្រប់គ្រងលើយើង។
២. និមិត្តរបស់ដានីយ៉ែលទាយយ៉ាងច្បាស់លាស់អំពីនគររបស់ព្រះ ដែលនឹងមកដល់ហើយនឹងស្ថិតស្ថេរអស់កល្បជានិច្ច។ នៅពេលព្រះយេស៊ូវយាងមកផែនដីហើយប្រកាសថា នគរព្រះជិតមកដល់ ដែលមានន័យថា តាមរយៈព្រះយេស៊ូវ នគរអស់កល្បជានិច្ច ដែលព្រះបានសន្យាតាមរយៈដានីយ៉ែល បានមកដល់ហើយ។ ប៉ុន្តែយើងទទួលបាននគរនេះតែផ្នែកដំបូងប៉ុណ្ណោះ គឺយើងរង់ចាំការយាងត្រឡប់មកវិញរបស់ព្រះយេស៊ូវ ដើម្បីទទួលបាននគរមួយដែលពេញលេញ។
៣. គំរូរបស់ដានីយ៉ែលលើកទឹកចិត្តយើងអោយដើរតាមព្រះដោយស្មោះត្រង់ បើទោះជានៅក្នុងស្ថានភាពលំបាកក៏ដោយ (សូមមើលហេព្រើរ១២:១-៣)។ នេះគឺជាការអនុវត្តត្រឹមត្រូវមួយ។ ប៉ុន្តែ យើងត្រូវប្រុងប្រយ័ត្ន ភាពក្លាហាននិងសេចក្តីស្មោះត្រង់របស់ដានីយ៉ែលនៅក្នុងទឹកដីនៃភាពជាប់ចំណងនិងភាពសាហាវយង់ឃ្នងអាចល្បួងយើងអោយយកគាត់ធ្វើជាវីរបុរសយ៉ាងសំខាន់នៅក្នុងរឿងដោយងាយស្រួល។ បន្ទាប់មកយើងអាចមានការកាត់ស្រាយនិងការអនុវត្តខុស ហើយគ្រាន់តែអានកណ្ឌនេះដូចជាអានរឿងវីរបុរសមួយ ដែលព្រះបានសង្គ្រោះដានីយ៉ែលនិងមិត្តភក្តិរបស់គាត់ ដោយព្រោះពួកគេស្មោះត្រង់។ បើសិនយើងធ្វើដូច្នេះ នោះយើងបាត់បង់សាររបស់ដានីយ៉ែលផ្ទាល់ហើយ គឺព្រះជាវីរបុរស ហើយទ្រង់នឹងតាំងនគរអស់កល្បជានិច្ចរបស់ទ្រង់ឡើងតាមរយៈ «កូនមនុស្ស»។ ដានីយ៉ែលនិងមិត្តភក្តិរបស់គាត់បានស្មោះត្រង់ ដោយព្រោះពួកគេបានស្គាល់ព្រះដ៏ពិតតាមរយៈអំណាច សេចក្តីសន្យា និងព្រះគុណរបស់ទ្រង់។
៤. ព្រះគម្ពីរសញ្ញាថ្មីប្រាប់គ្រីស្ទបរិស័ទថា ពួកគេត្រូវតែរស់នៅជាអ្នកសំណាក់នៅនិងអ្នកនិរទេសនៅក្នុងលោកិយនេះ (យ៉ាកុប ១:១; ភីលីព ៣:២០; ១ពេត្រុស ១:១,១៧; ២:១១)។ ដូច្នេះ ជីវិតរបស់រាស្ត្ររបស់ព្រះនៅក្នុងការនិរទេសផ្តល់នូវរូបភាពល្អមួយអំពីជីវិតសំរាប់គ្រីស្ទបរិស័ទនៅក្នុងលោកិយសព្វថ្ងៃនេះ។ គ្រីស្ទបរិស័ទប្រឈមនឹងទុក្ខលំបាកស្រដៀងគ្នាជាច្រើន ដែលពួកនិរទេសបានជួបប្រទះ។ យើងរស់នៅក្នុងចំណោមមនុស្ស ដែលមិនស្គាល់ព្រះ ហើយទាស់នឹងព្រះ។ ព្រះរាជសារដែលថា ព្រះនៅតែគង់ជាមួយរាស្ត្ររបស់ទ្រង់ ទ្រង់ពិតជាគ្រប់គ្រងលើទាំងអស់ និងសេចក្តីជំនឿរបស់ពួកគេនៅក្នុងទ្រង់ លើកទឹកចិត្តដល់យើងនៅសព្វថ្ងៃនេះ។
Leave a Reply