ក្រុង ស៊ីដូន Sidon
ក្រុងស៊ីដូនជាក្រុងពីសម័យបុរាណ ស្ថិតនៅក្នុងស្រុកភេនីស ដែលស្ថិតនៅមាត់ច្រាំងសមុទ្រមេឌីទែរ៉ាណេ ហើយមានចម្ងាយប្រហែល៣២គីឡូម៉ែត្រពីខាងជើងក្រុងទីរ៉ុស។ នៅសម័យបុរាណ ក្រុងស៊ីដូនគឺជាទីក្រុងដ៏សំខាន់មួយ។ ក្រុងនេះជាព្រំដែនខាងជើងនៃអំបូរអេសើរ (យ៉ូស្វេ ១៩:២៤, ២៨)។ យេសិបិល ដែលជាប្រពន្ធដ៏អាក្រក់របស់ស្តេចអ័ហាប់ (ស្តេចអ៊ីស្រាអែល) គឺជាកូនស្រីរបស់ស្តេចស៊ីដូន (១ពង្សាវតារក្សត្រ ១៦:៣១)។ ឈ្មោះ «ស៊ីដូន» និង «ជនជាតិស៊ីដូន» លេចឡើងចំនួន៣៨ដងនៅក្នុងសញ្ញាចាស់ និង១២ដងនៅក្នុងសញ្ញាថ្មី។ លោកុប្បត្ដិជំពូក១០ បង្ហាញថា ស៊ីដូនគឺជាកូនច្បងរបស់កាណាន (ខ.១៥) ហើយកាណានគឺជាកូនប្រុសរបស់ហាំ (ខ.៦)។ នេះបង្ហាញថា ក្រុងស៊ីដូនគឺជាក្រុងដ៏ចំណាស់មួយ។ ទឹកដីរបស់ជនជាតិកាណានលាតសន្ធឹងចាប់តាំងពីក្រុងស៊ីដូន ដែលនៅជិតក្រុងកេរ៉ា រហូតដល់ក្រុងកាសា និងរហូតដល់ក្រុងសូដុម ក្រុងកូម៉ូរ៉ា ក្រុងអាដម៉ា និងក្រុងសេបោម ហើយរហូតទៅដល់ក្រុងឡាសា (ខ.១៩)។
ជាញឹកញាប់ យើងឃើញឈ្មោះក្រុងស៊ីដូនលេចឡើងជាមួយនឹងទីរ៉ុស (ឧទាហរណ៍ អេសាយ ២៣:១, ២; យេរេមា ៤៧:៤; ម៉ាថាយ ១១:២១, ២២)។ ការធ្វើជំនួញនិងឧស្សហ៍កម្មមានសារៈសំខាន់សំរាប់ក្រុងទាំងពីរនេះ។
ជនជាតិស៊ីដូនបានថ្វាយបង្គំរូបព្រះជាច្រើន។ ព្រះបាតដ៏សំខាន់បំផុតឈ្មោះថា Eshmun (ជាព្រះនៃការប្រោសឲ្យជា) ហើយគេបានសាងសង់ព្រះវិហារដ៏ធំមួយសម្រាប់ព្រះនេះ។ ព្រះនាងដ៏សំខាន់បំផុតឈ្មោះថា Astarte ដែលមានឈ្មោះល្បីល្បាញនៅស្រុកប៉ាឡេស្ទីននៅសម័យអ៊ីស្រាអែល។ អ៊ីស្រាអែលធ្លាប់បានថ្វាយបង្គំនិងបម្រើរូបព្រះរបស់ជនជាតិស៊ីដូនដែរ (ពួកចៅហ្វាយ ១០:៦)។ នៅពេលមានទុរ្ភិក្សនៅសម័យស្តេចអ័ហាប់ ហោរាអេលីយ៉ាបានរស់នៅក្នុងផ្ទះរបស់ស្រីមេម៉ាយនៅស៊ីដូន (១ពង្សាវតារក្សត្រ ១៧:៩; លូកា ៤:២៥, ២៦)។
នៅក្នុងសញ្ញាថ្មី ព្រះយេស៊ូវបានប្រោសក្មេងស្រីម្នាក់ពីតំបន់ស៊ីដូនឲ្យជា (ម៉ាថាយ ១៥:២១–២៨) ហើយមានបណ្តាជនបានធ្វើដំណើរមកពីទីរ៉ុសនិងស៊ីដូន ដើម្បីស្ដាប់ព្រះយេស៊ូវ និងសូមព្រះអង្គប្រោសគេអោយជាពីជំងឺ (លូកា ៦:១៧)។ ពេលលោកប៉ុលធ្វើដំណើរទៅក្រុងរ៉ូម ដើម្បីជួបនឹងសេសារ នាវាបានឈប់ជាលើកដំបូងនៅស៊ីដូន ដែលជាកន្លែងដែលនាយទាហានយូលាសបានអនុញ្ញាតឱ្យលោកប៉ុលទៅមាត់សមុទ្រដើម្បីទៅជួបមិត្តភក្តិរបស់គាត់ (កិច្ចការ ២៧:៣)។
Leave a Reply