Micah 6 pdf download
ដើម្បីស្រាវជ្រាវអំពីកណ្ឌមីកា សូមអានឯកសារ «ពាក្យលំនាំ ៖ មីកា» http://www.dkdl.org/?page_id=1504 ដែលបានបង្រៀនអំពីស្ថានភាពប្រវត្តិសាស្ត្រនៅសម័យហោរាមីកា និងព្រះរាជសារនៃកណ្ឌនេះ។
ជារឿយៗ សារព័ត៌មានផ្សាយអំពីការកាត់ក្តីខ្មែរក្រហម ពីព្រោះវាគឺជាព្រឹត្តិការណ៍សំខាន់មួយ។ ខ្មែរក្រហមបានប្រព្រឹត្តបទឧក្រិដ្ឋដ៏ធ្ងន់ធ្ងរ ហើយមនុស្សចង់មើលឃើញយុត្តិធម៌។ ការកាត់ក្តីសំខាន់ ហើយយុត្តិធម៌ក៏សំខាន់ដែរ។ ប៉ុន្តែនៅក្នុងព្រះគម្ពីរ អំពើបាបគឺលើសពីការអាក្រក់ ដែលមនុស្សប្រព្រឹត្តចំពោះគ្នាទៅទៀត គឺអំពើរួមបញ្ចូលទាំងការអាក្រក់ ដែលមនុស្សប្រព្រឹត្តចំពោះព្រះ ហើយព្រះមានសិទ្ធិនាំមនុស្សមកឯការកាត់ទោសសំរាប់អំពើបាបរបស់ពួកគេប្រឆាំងនឹងព្រះ និងប្រឆាំងនឹងមនុស្សដទៃទៀត។
ជំពូក៦ គឺជារូបភាពមួយអំពីការកាត់ទោសរាស្ត្ររបស់ព្រះនៅចំពោះអង្គទ្រង់ដ៏ជាចៅក្រម។ ព្រះហៅរាស្ត្ររបស់ទ្រង់អោយអង្វររឿងក្តីរបស់ពួកគេនៅចំពោះភ្នំធំទាំងឡាយ ហើយបន្ទាប់មកអោយភ្នំធំទាំងឡាយនោះស្តាប់អ្វីដែលព្រះអង្គទ្រង់ត្រូវមានបន្ទូលក្នុងនាមជាចៅក្រម ពីព្រោះទ្រង់កើតរឿងក្តីនឹងពួកគេ (៦:២)។ ហេតុអ្វី? តើពួកគេបានប្រព្រឹត្តអំពើបាបអ្វីខ្លះ? ខ. ៩-១៦ ជាបញ្ជីអំពើបាបមួយចំនួនរបស់ពួកគេ រួមទាំងសេចក្តីអយុត្តិធម៌ និងទ្រព្យសម្បត្តិជាផលអាក្រក់ (៦:១០) ហើយនិងសាសនាក្លែងក្លាយរបស់ពួកគេ (៦:១៦)។
ប៉ុន្តែ នៅមុនពេលយើងស្តាប់លឺបញ្ជីអំពើបាបនោះ ព្រះបានរំលឹកអ៊ីស្រាអែលជាដំបូងអំពីព្រះពរ ដែលទ្រង់បានប្រទានដល់ពួកគេ (៦:៤-៥) ដែលទ្រង់បានរំដោះពួកគេចេញអេស៊ីព្ទ ហើយទ្រង់បានសង្គ្រោះពួកគេចេញស្តេចម៉ូអាប់ ហើយបានដឹកនាំពួកគេធ្វើដំណើរចេញមក។
៦:៦-៧ បង្ហាញថា បណ្តាជនកាន់តាមសាសនា គឺពួកគេបានប្រារព្ធពិធីបុណ្យសាសនាផ្សេងៗ ប៉ុន្តែព្រះមិនបានសព្វព្រះហឫទ័យចំពោះពួកគេឡើយ។ អ្វីដែលសំខាន់នៅក្នុងការថ្វាយបង្គំគឺថា តើព្រះសព្វព្រះហឫទ័យចំពោះការថ្វាយបង្គំរបស់យើងដែរឬទេ? (សូមមើលមេរៀនអំពីការថ្វាយបង្គំ) ហើយ ៦:៨ បង្ហាញថា ព្រះមិនសព្វព្រះហឫទ័យចំពោះពិធីបុណ្យសាសនានោះឡើយ ប៉ុន្តែទ្រង់សព្វព្រះហឫទ័យចំពោះយុត្តិធម៌ សេចក្តីមេត្តាករុណា និងការបន្ទាបខ្លួនវិញ។
ការប្រកាសព្រះគ្រីស្ទ
មានផ្លូវខ្លះៗ ដែលជំពូកនេះដឹកនាំយើងទៅកាន់ព្រះយេស៊ូវ។
១. ជំពូក៦ បង្ហាញថា ព្រះទតឃើញគ្រប់ទាំងអស់ ហើយទ្រង់គឺជាចៅក្រម ប៉ុន្តែបញ្ហារបស់យើងគឺថា យើងទាំងអស់គ្នាបានធ្វើបាបប្រឆាំងនឹងព្រះ ដូច្នេះហើយយើងទាំងអស់គ្នាសមនឹងទទួលការកាត់ទោស។ សេចក្តីពិតនេះគឺជាមូលដ្ឋានគ្រឹះក្នុងការជួយយើងអោយយល់អំពីដំណឹងល្អ។ ហេតុផលដែលព្រះយេស៊ូវបានយាងមកគឺពីព្រោះយើងបានបះបោរប្រឆាំងនឹងព្រះ ហើយទ្រង់គឺជាចៅក្រោម រីឯយើងមានទោស ហើយសមនឹងទទួលការកាត់ទោសពីទ្រង់។ ដំណោះស្រាយតែមួយគត់សំរាប់បញ្ហានេះគឺជាការសុគតរបស់ព្រះយេស៊ូវនៅលើឈើឆ្កាង។
២. តើខ. ៤-៥ មានការអនុវត្តអ្វីខ្លះសំរាប់គ្រីស្ទបរិស័ទនៅសព្វថ្ងៃនេះ? យើងមិនមែនជាពួកយូដា ដែលព្រះបានរំដោះចេញពីអេស៊ីព្ទទេ ប៉ុន្តែគោលការណ៍នៅទីនេះនៅតែអនុវត្តមកកាន់យើងដែរ។ ដូចដែលព្រះបានរំលឹកជនជាតិអ៊ីស្រាអែលអំពីសេចក្តីប្រោសលោះរបស់ទ្រង់នៅក្នុងអតីតកាល ដើម្បីបង្ហាញថា ទ្រង់មិនបានប្រព្រឹត្តខុសចំពោះពួកគេឡើយ ហើយពួកគេគួរតែដឹងគុណ ស្រឡាញ់ និងស្តាប់បង្គាប់តាមទ្រង់ ហើយពួកគេកាន់តែអាក្រក់ ដោយសារមិនស្តាប់បង្គាប់ទ្រង់ នោះព្រះក៏រំលឹកយើងអំពីរបៀបដែលទ្រង់បានប្រោស លោះយើងតាមរយៈការសុគតនៅលើឈើឆ្កាង និងការមានព្រះជន្មរស់ឡើងវិញរបស់ព្រះយេស៊ូវ (១កូរិនថូស ១៥:១-៤) ហើយព្រះគុណនេះគួរតែលើកទឹកចិត្តអោយស្តាប់បង្គាប់តាមព្រះ ហើយមើលឃើញថា វាអាក្រក់ខ្លាំងប៉ុណ្ណាដែលបានសង្គ្រោះដោយសារព្រះហើយ តែបែរជាភ្លេចបន្ទាប់មករស់នៅដោយបះបោរប្រឆាំងនឹងទ្រង់ទៅវិញផងដែរ (រ៉ូម ៦:១-១៤; អេភេសូរ ២:៨-១០; កូល៉ុស ៣:១-១០; ២ពេត្រុស ១:៥-៨)។
៣. លក្ខណៈទាំងអស់ ដែលផ្គាប់ព្រះហឫទ័យព្រះនៅក្នុង ៦:៨ គឺ យុត្តិធម៌ សេចក្តីមេត្តាករុណា និងការបន្ទាបខ្លួន ហើយព្រះយេស៊ូវក៏នៅតែតម្រូវអោយរាស្ត្ររបស់ទ្រង់នៅក្នុងសម្ព័ន្ធមេត្រីថ្មីមានលក្ខណៈទាំងនេះផងដែរ (ឧទាហរណ៍ ម៉ាថាយ ៥:៧; ២៣:២៣; អេភេសូរ ៤:២; ភីលីព ២:៣; យ៉ាកុប ៤:១០; ១ពេត្រុស ៥:៦)។ សេចក្តីតម្រូវទាំងនេះមកពីព្រះ ដើម្បីបង្ហាញថា គ្មានអ្នកណាបានរស់នៅត្រឹមត្រូវតាមខ្នាតគំរូរបស់ព្រះឡើយ ហើយបង្ហាញម្តងទៀតថា យើងត្រូវការសេចក្តីអត់ទោសតាមរយៈការសុគត និងការមានព្រះជន្មរស់ឡើងវិញរបស់ព្រះយេស៊ូវ។
Leave a Reply