សាសន៍កាឌ Gadites គឺជាពូជពង្សរបស់កាឌ ដែលជាកូនប្រុសទីប្រាំពីររបស់យ៉ាកុបជាមួយស៊ីលផា (សូមមើល http://www.dkdl.org/?page_id=2021) បាវស្រីរបស់លេអា ហើយជាបងប្រុសរបស់អេស៊ើរ (លោកុប្បត្ដិ ៣០:១១–១៣; ៤៦:១៦, ១៨)។
នៅពេលធ្វើដំណើរឆ្លងកាត់វាលរហោស្ថានពូជអំបូរកាឌមានទីតាំងនៅខាងត្បូងរោងឧបោសថជាមួយស៊ីម្មាននិងរូបេន (ជនគណនា ២:១៤)។ នៅក្នុងប្រវត្តិសាស្ត្ររបស់ពូជអំបូររូបេននិងកាឌ ពួកគេបានបន្តចិញ្ចឹមនិងឃ្វាលហ្វូងសត្វ (ជនគណនា ៣២:១-៥)។
ចំណែកទឹកដី ដែលត្រូវបានបែងចែកសម្រាប់ពូជអំបូរកាឌគឺនៅខាងកើតយ័រដាន់រួមទាំងតំបន់ផ្សេងៗដែលសោភណភាពនិងជីជាតិយ៉ាងល្អ (ចោទិយកថា ៣:១២)ដែលខាងកើតហ៊ុមព័ទ្ធដោយវាលរហោស្ថានអារ៉ាប់ហើយខាងលិចដោយទន្លេយ័រដាន់ (យ៉ូស្វេ ១៣:២៧) ហើយខាងជើងដោយស្ទឹងយ៉ាបុក។ នៅភាគខាងជើងទឹកដីនេះរួមបញ្ចូលទាំងជ្រលងយ័រដាន់រហូតដល់សមុទ្រកាលីឡេ។
ពូជអំបូរនេះកាចសាហាវនិងចូលចិត្តសង្គ្រាមហើយពួកគេគឺជា «មនុស្សខ្លាំងពូកែមានចិត្តក្លាហានហើយស្ទាត់ក្នុងចំបាំងក៏ចេះប្រើទាំងខែលនិងលំពែងគេមានមុខដូចជាមុខសិង្ហហើយក៏រហ័សដូចជាឈ្លូសនៅលើភ្នំ» (១របាក្សត្រ ១២:៨; ៥:១៩–២២)។ ហោរាអេលីយ៉ាក៏មកពីពូជអំបូរនេះដែរ (១ពង្សាវតារក្សត្រ ១៧:១)។ ស្តេចទីកឡាតពេឡេស៊ើរ Tiglath-pileser បានចាប់នាំយកពូជអំបូរនេះទៅក្នុងទាសភាពជាមួយពូជអំបូរផ្សេងៗទៀតមកពីអ៊ីស្រាអែល (អាណាចក្រខាងជើង) (១របាក្សត្រ ៥:២៦) ហើយនៅសម័យហោរាយេរេមា (៤៩:១) សាសន៍អាំម៉ូនបានមករស់នៅក្នុងទីក្រុងផ្សេងៗរបស់ពួកគេ។
Leave a Reply