សាសន៍ភីលីស្ទីន Philistines គឺជាពូជអំបូរដែលជាសម្ព័ន្ធមិត្តជាមួយសាសន៍ភេនីស។ ពួកគេគឺជាមែកធាងនៃពូជអំបូរ ដែលរស់នៅពាសពេញស្រុកល្បាណូន ជ្រលងយ័រដាន់ កោះក្រេត និងកោះសមុទ្រមេឌីទែរ៉ាណេ។ អ្នកខ្លះគិតថា ពួកគេគឺជាមែកធាងរបស់ពួករេផែម (២សាំយូអែល ២១:១៦-២២)។ នៅសម័យអ័ប្រាហាំ ពួកគេបានរស់នៅភាគខាងត្បូងឆៀងខាងលិចនៃស្រុកយូដា ដែលមានអ័ប៊ីម៉្មាឡិចជាស្តេចរបស់ពួកគេ (លោកុប្បត្ដិ ២១:៣២, ៣៤; ២៦:១)។ សាសន៍ភីលីស្ទីនបានកាន់កាប់ទីក្រុងប្រាំគឺ ក្រុងកាសា ក្រុងអាសកាឡូន ក្រុងអាសដូឌ ក្រុងអេក្រុន និងក្រុងកាថ នៅជ្រុងខាងត្បូងឆៀងខាងលិចនៃស្រុកកាណាន។ នៅក្នុងកណ្ឌគម្ពីរទាំងប្រាំដំបូងរបស់ម៉ូសេមិនបានកត់ត្រាអំពីពួកគេនៅក្នុងចំណោមពូជអំបូរនៅស្រុកកាណានឡើយ។ ហោរាអេម៉ុស (៩:៧) និងហោរាយេរេមា (៤៧:៤) បាននិយាយថា ពួកគេមកពីកោះកាប់ថោរ ប្រហែលជាកោះក្រេត ឬអ្នកខ្លះគិតថា ដីសន្តរបស់ស្រុកអេស៊ីព្ទ។ នៅក្នុងកំណត់ត្រាទាំងស្រុងចាប់ពីកណ្ឌនិក្ខមនំដល់កណ្ឌសាំយូអែល ពួកគេរស់នៅតំបន់មួយក្នុងស្រុក ដែលស្ថិតនៅចន្លោះស្រុកយូដានិងស្រុកអេស៊ីព្ទ (និក្ខមនំ ១៣:១៧; ១៥:១៤-១៥; យ៉ូស្វេ ១៣:៣; ១សាំយូអែល ៤)។
ជារឿយៗ ពូជអំបូរដ៏ខ្លាំងនេះបានលុកលុយសាសន៍ហេព្រើរ។ សង្គ្រាមបានកើតឡើងរវាងពួកគេស្ទើរតែមិនដាច់។ ពេលខ្លះ ពួកគេបានគ្រប់គ្រងលើអំបូរផ្សេងៗ ជាពិសេសពូជអំបូរនៅភាគខាងត្បូង (ពួកចៅហ្វាយ ១៥:១១; ១សាំយូអែល ១៣:១៩–២២) ហើយនៅពេលផ្សេងៗទៀត ពួកគេបានធ្វើសង្គ្រាមចាញ់គេ (១សាំយូអែល ១៤:១-៤៧; ១៧)។ ភាពជាខ្មាំងសត្រូវនឹងគ្នាទាំងនេះមិនបានបញ្ចប់ទេ រហូតដល់សម័យស្តេចហេសេគា (២ពង្សាវតារក្សត្រ ១៨:៨) នៅពេលពួកគេត្រូវគេបង្ក្រាបបានទាំងស្រុង។ ប៉ុន្តែពួកគេនៅតែកាន់កាប់ទឹកដីរបស់ពួកគេដដែល ហើយតែងតែបង្ហាញសេចក្តីស្អប់ពីដើមចំពោះអ៊ីស្រាអែល (អេសេគាល ២៥:១៥-១៧)។ ទីបំផុត ពួករ៉ូម៉ាំងបានច្បាំងដណ្តើមយកទឹកដីរបស់ពួកគេបាន។
Leave a Reply