កាឡាទី ១:១១–២៤
សូមអានកាឡាទី ១:១១-២៤ ទាំងមូល។
ការរំលឹក ទោះបីជាព្រះជាម្ចាស់បានប្រើលោកប៉ុលផ្ទាល់ដើម្បីបង្កើតពួកជំនុំនៅស្រុកកាឡាទីក៏ដោយ ក៏ពួកគេឆាប់ងាកចេញពីព្រះជាម្ចាស់ ហើយបែរទៅរកដំណឹងល្អមួយផ្សេងទៀតដែរ។ មានគ្រូក្លែងក្លាយបានចូលមកក្នុងពួកជំនុំនៅស្រុកកាឡាទី ហើយបានប្រកាសដំណឹងល្អមួយផ្សេងទៀត។ លោកប៉ុលមិនដកខ្លួនចេញឆ្ងាយពីស្ថានភាពនេះទេ ប៉ុន្តែហ៊ានសរសេរសំបុត្រនេះដើម្បីដោះស្រាយបញ្ហានេះ ពីព្រោះគាត់ត្រូវពង្រឹងដំណឹងល្អ។
សូមអានខ.១១-១២ ទ្បើងវិញ។ តើ លោកប៉ុលបានទទួលដំណឹងល្អយ៉ាងដូចម្ដេច?
ការពន្យល់ និងការអនុវត្ត គ្រីស្ទបរិស័ទនៅកាឡាទីបានឮដំណឹងល្អពីរដែលខុសពីគ្នា គឺដំណឹងល្អដែលលោកប៉ុលបានប្រកាស និងដំណឹងល្អដែលគ្រូក្លែងក្លាយបានប្រកាស។ ពួកកាឡាទីត្រូវតែជ្រើសរើស។ នៅទីនេះលោកប៉ុលបង្រៀនថា ដំណឹងល្អដែលគាត់បានថ្លែងប្រាប់គឺជាដំណឹងល្អដែលព្រះយេស៊ូវគ្រីស្ទបានបើកសំដែងអោយលោកប៉ុល។ ដូច្នេះពួកកាឡាទីត្រូវស្ដាប់តាមដំណឹងល្អដែលលោកប៉ុលបានប្រកាស។ នៅទីនេះនិងក្នុងអត្ថបទក្រោយលោកប៉ុលនឹងបង្ហាញថា គាត់ជាសាវកពិតប្រាកដ ពីព្រោះមានអ្នកខ្លះបានចោទប្រកាន់ថា គាត់មិនមកពីក្រុមសាវកនៅយេរូសាឡិមនោះទេ ដូច្នេះហើយគាត់មិនជាសាវកពិតប្រាកដឡើយ។ សព្វថ្ងៃនេះយើងបានទទួលដំណឹងល្អពិតប្រាកដតាមរយៈការសរសេររបស់ពួកសាវក ដែលយើងមាននៅក្នុងសញ្ញាថ្មី។
សូមអានខ.១៣-១៤។ តើ លោកប៉ុលបានធ្វើអ្វីមុនគាត់បានជឿលើព្រះយេស៊ូវ?
សូមអានខ.១៥-១៧។ តើ លោកប៉ុលបានធ្វើអ្វីនៅពេលព្រះបានបើកសំដែងព្រះរាជបុត្រាទ្រង់មកក្នុងគាត់?
កំណត់ «ព្រះ ដែលរើសខ្ញុំតាំងពីផ្ទៃម្តាយមក ហើយបានហៅខ្ញុំ» ជាឃ្លាដែលហោរាខ្លះនៅក្នុងសញ្ញាចាស់បានប្រើមកពិពណ៌នាអំពីខ្លួនរបស់ពួកគេ(ឧទាហរណ៍ យេរេមា ១:៥; អេសាយ ៤៩:១)។
សូមអានខ.១៨-១៩។ តើ រយៈពេល៣ឆ្នាំក្រោយមកទៀត លោកប៉ុលបានធ្វើអ្វី?
ការពន្យល់ លោកប៉ុលបានបញ្ជាក់ប្រាប់ថា គាត់មិនបានជួបពួកសាវកអស់រយៈពេល៣ឆ្នាំដើម្បីបង្ហាញថា គាត់មិនបានទទួលដំណឹងល្អពីគេទេ (១:១២)។
សូមអានខ.២០-២១។ តើ បន្ទាប់មកលោកប៉ុលបានធ្វើអ្វីទៀត?
កំណត់ ខ.២១-២២ «ស្រុកស៊ីរី និងស្រុកគីលីគា» នៅខាងជើងស្រុកកាលីឡេហើយមានទីក្រុងអន់ទីយ៉ូកនិងដាម៉ាស។ ស្រុកយូដានៅខាងត្បូងស្រុកកាលីឡេ។
| ព្រឹត្តិការណ៍ | ប្រហែលជា |
| លោកប៉ុលបានទទួលព្រះគ្រីស្ទ | ៣៣ គ.ស. |
| លោកប៉ុលនៅស្រុកអារ៉ាប់ | ៣៣-៣៥ គ.ស. |
| លោកប៉ុលឡើងទៅឯក្រុងយេរូសាឡិម | ៣៥ គ.ស. |
| លោកប៉ុលនៅស្រុកស៊ីរី និងស្រុកគីលីគា | ៣៥-៤៨ គ.ស. |
សូមអានខ.២២-២៤។ តើ ពួកជំនុំនៅស្រុកយូដាបានឮអ្វីអំពីលោកប៉ុល?
ការអនុវត្ត ប្រហែលជាយើងសន្មត់ថា អត្ថបទនេះមិនសូវសំខាន់សម្រាប់ជីវិតរបស់យើងទេ ប៉ុន្តែអត្ថបទនេះពិតជាមានការអនុវត្តសម្រាប់យើងរាល់គ្នា។ ទីមួយ អត្ថបទនេះបានសំដែងព្រះគុណដ៏អស្ចារ្យរបស់ព្រះជាម្ចាស់ ដែលព្រះអង្គបានសង្គ្រោះ និងប្រើលោកប៉ុលដែលពីមុនធ្លាប់ជាអ្នកបៀតបៀនគ្រីស្ទបរិស័ទ។ ទីពីរ លោកប៉ុលបានសរសេរសំបុត្រជាច្រើននៅក្នុងសញ្ញាថ្មី ដូច្នេះហើយយើងត្រូវដឹងយ៉ាងច្បាស់ថា លោកប៉ុលជាអ្នកដែលមានសិទ្ធិអំណាចមកពីព្រះអង្គ ហើយអត្ថបទនេះផ្ដល់ភស្តុតាងបញ្ជាក់ប្រាប់អំពីសិទ្ធិអំណាចរបស់លោកប៉ុល។ ទីបី នៅក្នុងអត្ថបទនេះលោកប៉ុលបានផ្ដល់គំរូល្អ ពីព្រោះគាត់សំដែងជីវិតរបស់ខ្លួន (មិនលាក់បំបាំងជីវិតទេ) ហើយយើងត្រូវដឹងអំពីជីវិតរបស់គ្រូបង្រៀននៃយើង។
រំលឹកទ្បើងវិញ តើយើងបានរៀនអ្វីចេញពីកាឡាទី ១:១១–២៤?
Leave a Reply