យ៉ូហាន ១៣:១-១៧
សូមអានយ៉ូហាន ១៣:១-១៧ ទាំងមូល។
ចូរអានខ.១ ទ្បើងវិញហើយឆ្លើយសំនួរខាងក្រោម។
តើ ជំពូកនេះបាននិទានអំពីព្រឹត្តិការណ៍ដែលកើតឡើងនៅមុនពិធីបុណ្យអ្វី?
តើ ព្រះយេស៊ូវជ្រាបអំពីអ្វី?
តើ ព្រះយេស៊ូវបានស្រឡាញ់នរណា?
ការពន្យល់៖ លោកយ៉ូហានបានចែងទុកកាលបរិច្ឆេទ ពីព្រោះព័ត៌មាននេះសំខាន់។ នៅបុណ្យរំលងពួកអ៊ីស្រាអែលបានថ្វាយយញ្ញបូជា (កូនចៀម) ហើយចងចាំថា ព្រះជាម្ចាស់បានប្រោសលោះគេអោយរួចពីទាសភាពក្នុងស្រុកអេស៊ីព្ទ។ ឥឡូវនេះព្រះជាម្ចាស់ប្រោសលោះយើងតាមរយៈរូបកាយរបស់ព្រះគ្រីស្ទ ដែលជាយញ្ញបូជានៃបុណ្យរំលង (១កូរិនថូស ៥:៧)។
ការពន្យល់ និងការអនុវត្ត៖ «ពេលកំណត់» គឺជាពាក្យសំខាន់នៅក្នុងកណ្ឌយ៉ូហាន។ នៅក្នុងយ៉ូហានជំពូក ១-១២ ព្រះគ្រីស្ទបានបង្រៀនច្រើន ហើយធ្វើការអស្ចារ្យជាច្រើន ដែលធ្វើអោយមនុស្សមានការភ្ញាក់ផ្អើលនិងស្ញប់ស្ញែង។ ប៉ុន្តែម្ដងហើយម្ដងទៀត លោកយ៉ូហានចែងទុកថា «ពេលកំណត់» («ពេលវេលា») របស់ព្រះគ្រីស្ទមិនទាន់បានមកដល់នៅឡើយទេ (២:៤; ៧:៣០; ៨:២០)។ ព័ត៌មាននេះសំខាន់ណាស់ ពីព្រោះវាបង្ហាញថា ការសុគតនៅលើឈើឆ្កាង និងការរស់ឡើងវិញ និងការឡើងទៅស្ថានសួគ៌គឺជាគោលបំណងរបស់ព្រះគ្រីស្ទ។ ការធ្វើអស្ចារ្យមិនមែនជា «ពេលវេលា» របស់ព្រះគ្រីស្ទទេ ប៉ុន្តែជាការសុគតវិញ (១២:២៣-២៤)។ កណ្ឌយ៉ូហានជំពូក ១៣-១៩ បានចែងទុកព្រឹត្តិការណ៍ដែលកើតឡើងក្នុងរយៈពេលតែ២៤ម៉ោងប៉ុណ្ណោះ។ ម្ដងទៀត ពត៌មាននេះបង្ហាញអំពីសារៈសំខាន់នៃព្រឹត្តិការណ៍ទាំងនេះ។ មនុស្សច្រើនចាប់អារម្មណ៍ចំពោះគ្រូដែលធ្វើការអស្ចារ្យ ប៉ុន្តែមិនសូវចាប់អារម្មណ៍ចំពោះការសុគតរបស់ព្រះគ្រីស្ទទេ។ គ្រីស្ទបរិស័ទមិនអាចមានគំនិតបែបនោះទេ។ ការសុគត ការរស់ឡើងវិញ នឹងការឡើងទៅស្ថានសួគ៌គឺជាគ្រឹះនៃជំនឿរបស់គ្រីស្ទបរិស័ទពិតប្រាកដ។
ចូរអានខ.២-៥។
តើ ព្រះយេស៊ូវជ្រាបអំពីអ្វី (ខ.៣)?
តើ ព្រះគ្រីស្ទបានធ្វើអ្វី (ខ.៤–៥)?
ការពន្យល់ និងការអនុវត្ត៖ អត្ថបទនេះកត់ត្រាអំពីព្រឹត្តិការណ៍មួយដែលគួរឱ្យភ្ញាក់ផ្អើលយ៉ាងខ្លាំង។ ដោយតាមរយៈការលាងជើងរបស់ពួកសាវក ព្រះយេស៊ូវបានបង្ហាញថា ទ្រង់គឺជាអ្នកបម្រើដ៏បន្ទាបខ្លួន ប៉ុន្តែសូមកំណត់អ្វីដែលព្រះអង្គជ្រាបមុននឹងទ្រង់បានលាងជើងរបស់ពួកគេ។ ព្រះគ្រីស្ទជ្រាបថា ព្រះ វរបិតាបានប្រគល់អ្វីៗទាំងអស់ មកក្រោមអំណាចរបស់ព្រះអង្គ។ តើ តាមធម្មតា មនុស្សដែលមានអំណាចខ្ពង់ខ្ពស់ធ្លាប់ធ្វើអ្វី? គេមិនបន្ទាបខ្លួនហើយបម្រើមនុស្សទេ! ប៉ុន្តែព្រះគ្រីស្ទវិញ ព្រះអង្គជ្រាបថាទ្រង់មានអំណាចលើទាំងអស់ ប៉ុន្តែព្រះអង្គមិនមានអំនួតមកពីអំណាចនោះ ហើយមិនបានប្រើប្រាស់សិទ្ធិអំណាចរបស់ខ្លួននៅក្នុងវិធីមួយដែលអត្មានិយមឡើយ។ តើ សេចក្ដីពិតនេះបានអនុវត្តនៅក្នុងជីវិតរបស់យើងយ៉ាងដូចម្ដេច?
ចូរអាន ខ.៦-១១។ ចូរសង្ខេបការសន្ទនារវាងព្រះយេស៊ូវនិងលោកពេត្រុស។
ការពន្យល់៖សំណួររបស់ពេត្រុសនៅក្នុង ខ.៦ បានបង្ហាញថា គាត់បានគិតថា សកម្មភាពរបស់ព្រះយេស៊ូវគឺជាការមិនសមស្រប។ វាគឺជាការលំបាកណាស់សម្រាប់ ពេត្រុស ដើម្បីទទួលយកការដែលគ្រូបង្រៀននិងម្ចាស់របស់ខ្លួនលាងជើងរបស់គាត់។ ចម្លើយរបស់ព្រះយេស៊ូវ (ខ.៨) បង្ហាញថា យើងចាំបាច់ត្រូវការការលាងពីព្រះគ្រីស្ទ។ ការនេះបង្ហាញថា សកម្មភាពរបស់ព្រះយេស៊ូវមានអត្ថន័យជ្រាលជ្រៅជាងការដែលគ្រាន់តែលាងជើងទៅទៀត។ ព្រះយេស៊ូវបានលាងជើងរបស់យូដាស ប៉ុន្តែ យូដាសគឺមិនស្អាតទេ។ អត្ថន័យដ៏ជ្រាលជ្រៅនេះគឺថា ព្រះយេស៊ូវនឹងសំអាតយើងដោយព្រះលោហិតរបស់ព្រះអង្គនៅលើឈើឆ្កាង។ យើងទទួលការសំអាតនេះដោយយើងទទួលជឿព្រះបន្ទូលរបស់ព្រះយេស៊ូវ។
ចូរអាន ខ.១២-១៧។ ពន្យល់
តើ ព្រះយេស៊ូវបានលើកទឹកចិត្តគេអោយធ្វើអ្វី?
ការពន្យល់និងការអនុវត្ត៖ចេញពី ខ.១២-១៧ យើងរៀនថា ការបម្រើរបស់ព្រះយេស៊ូវមិនគ្រាន់តែពន្យល់អំពីការសុគតរបស់ទ្រង់នៅលើឈើឆ្កាងប៉ុណ្ណោះទេ ប៉ុន្តែលើសពីនេះទៅទៀត ព្រះយេស៊ូវបានធ្វើជាគំរូអោយយើងរាល់គ្នាប្រព្រឹត្តតាម។ យើងគួរតែបម្រើអ្នកដទៃដោយការបន្ទាបខ្លួន។ ប្រសិនបើយើងមិនធ្វើដូចនោះទេ នោះយើងមិនធ្វើតាមគំរូរបស់គ្រូនិងម្ចាស់របស់យើងឡើយ។ តើ អ្នកធ្វើអ្វីដើម្បីបម្រើអ្នកដទៃ?
រំលឹកទ្បើងវិញ៖ តើយើងបានរៀនអ្វីអំពីព្រះយេស៊ូវចេញពីយ៉ូហាន ១៣:១–១៧?
ការអនុវត្ត៖ តាមអ្វីដែលអ្នកបានរៀនតាមរយៈបទគម្ពីរនេះ តើអ្នកត្រូវយកវាមកអនុវត្តយ៉ាងដូចម្តេចនាពេលសព្វថ្ងៃនេះ?
Leave a Reply