Joel Intro pdf download
កាលៈទេសៈតាមប្រវត្តិសាស្ត្រនៅសម័យយ៉ូអែលនិងខ្លឹមសារនៃប្រសាសន៍របស់យ៉ូអែល Historical background to Joel and basic message
យើងមិនដឹងច្រើនអំពីហោរាយ៉ូអែល ដែលជាហោរាមកពីយូដា (ប្រហែលយេរូសាឡិម)។ ឈ្មោះរបស់គាត់មានន័យថា «ព្រះយេហូវ៉ាគឺជាព្រះ»។ កណ្ឌយ៉ូអែលមានសារៈសំខាន់ខ្លាំងណាស់ ពីព្រោះហោរាយ៉ូអែលបង្ហាញអំពីអត្តចរិតរបស់ព្រះថា ទ្រង់បរិសុទ្ធ ហើយនឹងវិនិច្ឆ័យអំពើបាប។ ហោរាយ៉ូអែលក៏ប្រកាសអំពីសេចក្តីសន្យាដ៏ អស្ចារ្យរបស់ព្រះសំរាប់ពេលអនាគត ជាពេលមួយ ដែលព្រះនឹងសង្គ្រោះនិងចាក់បង្ហូរព្រះវិញ្ញាណរបស់ទ្រង់។ ប្រធានបទដ៏សំខាន់គឺ«ថ្ងៃនៃព្រះអម្ចាស់» ដែលប្រកាសអំពីពេលវេលាដែលព្រះដ៏មានឫទ្ធានុភាពខ្ពង់ខ្ពស់បំផុតយាងមកបំផ្លាញអ្វីៗទាំងអស់ (១:១៥; ២:១-២, ១១, ៣១; ៣:១៤) ហើយ«នៅគ្រានោះ» (ឬ «នៅថ្ងៃនោះ») (២:២៩; ៣:១, ១៨) ដែលប្រកាសអំពីពេលវេលាដែលព្រះអង្គនឹងចាក់បង្ហូរព្រះវិញ្ញាណនិងស្ដាររាស្រ្តរបស់ទ្រង់ឡើងវិញ។ ប្រធានបទសំខាន់មួយទៀតគឺ យើងត្រូវយំសោក និងសោកសង្រេងដោយសារបាបរបស់យើងនិងការជំនុំជំរះរបស់ព្រះជាម្ចាស់ (១:៥, ៨, ៩, ១១, ១៣; ២:១២, ១៧)។
គម្រោង Outline
១. ការវិនិច្ឆ័យលើយូដា និងថ្ងៃនៃព្រះអម្ចាស់ (១:១-២:១៧)
ក. ការវាយប្រហាររបស់សត្វកណ្តូប (១:១-២០)
ខ. ការវាយប្រហាររបស់កងទ័ព (២:១-១៧)
២. សេចក្តីមេត្តាករុណារបស់ព្រះអម្ចាស់ និងការវិនិច្ឆ័យលើជាតិសាសន៍ទាំងអស់ (២:១៨-៣:២១)
ក. សេចក្តីមេត្តាករុណា៖ ព្រះអម្ចាស់ឆ្លើយតបដោយការស្ដាររាស្ត្ររបស់ទ្រង់ឡើងវិញ (២:១៨-៣២)
ខ. ការវិនិច្ឆ័យ៖ ការវិនិច្ឆ័យរបស់ព្រះអម្ចាស់លើជាតិសាសន៍ទាំងអស់ និងការគង់នៅជាមួយរាស្ត្ររបស់ទ្រង់ (៣:១-២១)
តើកណ្ឌយ៉ូអែលបង្រៀនយើងអ្វីខ្លះអំពីព្រះ?
តាមការរៀបរាប់ខាងលើនេះ យើងមើលឃើញថា កណ្ឌយ៉ូអែលបង្រៀនថា
- ព្រះគឺជាព្រះដ៏ពិត ហើយព្រះដទៃទាំងអស់សុទ្ធតែជាព្រះក្លែងក្លាយទាំងអស់។ សូមចាំថាឈ្មោះ “យ៉ូអែល”មានន័យថា«ព្រះយេហូវ៉ាជាព្រះ»។
- បរិសុទ្ធ និងទតឃើញគ្រប់ទាំងអស់ ហើយដាក់ទណ្ឌកម្មចំពោះអំពើបាប។
- មានបន្ទូលមកកាន់រាស្ត្ររបស់ទ្រង់ ហើយពន្យល់អំពីផែនការរបស់ទ្រង់សំរាប់លោកិយ។
- ព្រះហៅយើងអោយទុកចិត្ត ស្តាប់បង្គាប់ និងវិលមករកព្រះអម្ចាស់វិញ (២:១២)។
- ព្រះអង្គប្រណីសន្ដោស អាណិតអាសូរ អត់ធ្មត់ មេត្តាករុណា ព្រះអង្គមិនសព្វព្រះហឫទ័យដាក់ទោសទេ (២:១៣)។
- ទ្រង់ប្រទានព្រះវិញ្ញាណបរិសុទ្ធ (២:២៩)។
- ព្រះអង្គហៅយើងអោយទួញយំ ព្រមទាំងសោកសង្រេង (១:៥,៨,៩,១១,១៣; ២:១២,១៧)។
តើកណ្ឌនេះបង្រៀនយើងអ្វីខ្លះអំពីមនុស្ស?
- ចិត្តរបស់មនុស្សតែងតែវៀចវេរមិនអាចកែតម្រង់បានឡើយ (យើងត្រូវការព្រះវិញ្ញាណបរិសុទ្ធ)។
- មនុស្សបះបោរប្រឆាំងនឹងព្រះ ហើយសមនឹងទទួលទណ្ឌកម្មពីទ្រង់។
- ព្រះបន្ទូលរបស់ព្រះលើកទឹកចិត្តមនុស្សអោយវិលមកទ្រង់វិញ។
តើកណ្ឌនេះអនុវត្តមកកាន់គ្រីស្ទបរិស័ទសព្វថ្ងៃយ៉ាងដូចម្តេច?
កណ្ឌយ៉ូអែលទាក់ទងនឹងជីវិតរបស់យើងនាពេលសព្វថ្ងៃនេះនៅក្នុងរបៀបជាច្រើន។
១. ហោរាយ៉ូអែលបានប្រកាសទាំងដំណឹងអំពីការវិនិច្ឆ័យរបស់ព្រះនិងដំណឹងល្អអំពីសេចក្តីសង្គ្រោះដែលព្រះបានសន្យា។ កណ្ឌនេះមានការបរិយាយអំពីការវិនិច្ឆ័យបែបជាទម្រង់ល្ខោនមួយស្តីពីរាស្ត្ររបស់ព្រះតាមរយៈគ្រោះកាចដ៏ធំនៃសត្វកណ្តូប។ ហោរាយ៉ូអែលបរិយាយការវិនិច្ឆ័យនេះថាជាថ្ងៃនៃព្រះអម្ចាស់ (យ៉ូអែល ១:១៥; ២:១-២, ១១)។ នៅបច្ចុប្បន្ន ការនេះគឺជាការព្រមានមួយដ៏ធំអំពី «ថ្ងៃនៃព្រះអម្ចាស់» នៅពេលចុងក្រោយ នាពេលព្រះយេស៊ូវយាងត្រឡប់មកវិញ ហើយនឹងនាំមកនូវការវិនិច្ឆ័យរបស់ព្រះ។ នៅក្នុងព្រះគម្ពីរសញ្ញាថ្មី «ថ្ងៃនៃព្រះអម្ចាស់» ក្លាយជា «ថ្ងៃនៃព្រះយេស៊ូវ»។ ដូចដែលព្រះបានបំពេញសំរេចការព្រមានរបស់ទ្រង់ ដោយនាំការវិនិច្ឆ័យនិងការបំផ្លាញនៅក្នុងព្រះគម្ពីរសញ្ញាចាស់ នោះទ្រង់ក៏នឹងបំពេញសំរេចសេចក្តីសន្យារបស់ទ្រង់ ក្នុងការនាំការវិនិច្ឆ័យមកលើលោកិយនេះ នៅពេលព្រះយេស៊ូវទ្រង់យាងត្រឡប់មកវិញ។ យើងត្រូវតែត្រៀមខ្លួនសំរាប់ថ្ងៃនោះ (ម៉ាថាយ ២៤:៤២-២៥:៤៦)។ របៀបត្រៀមខ្លួនសំរាប់ថ្ងៃនោះគឺត្រូវអំពាវនាវដល់ព្រះនាមរបស់ព្រះអម្ចាស់ (២:៣១-៣២) ។
២. សំរាប់យើងនៅសព្វថ្ងៃនេះ ការនេះមានន័យថាអោយយើងស្រែកអំពាវនាវដល់ព្រះនាមរបស់ព្រះយេស៊ូវ (សូមមើលរ៉ូម ១០:៩-១៣)។
៣. កណ្ឌយ៉ូអែលក៏មានសេចក្តីសន្យាដ៏សំខាន់មួយនៅក្នុងព្រះគម្ពីរសញ្ញាចាស់ ដែលទាក់ទងនឹងការយាងមកដល់ របស់ព្រះវិញ្ញាណបរិសុទ្ធក្នុងពេលអនាគត (២:២៨-២៩)។ សាវ័កពេត្រុសដកស្រង់ចេញពីកណ្ឌយ៉ូអែលនៅថ្ងៃបុណ្យទី៥០ ដើម្បីបង្ហាញថា សេចក្តីសន្យារបស់ព្រះតាមរយៈហោរាយ៉ូអែលអំពីការចាក់បង្ហូរព្រះវិញ្ញាណកំពុងត្រូវបានបំពេញសំរេចពេលនេះហើយ (កិច្ចការ ២:១៦-២១)។
៤. ហោរាយ៉ូអែលហៅអោយបណ្តាជនប្រែចិត្ត។ ជារឿយៗ យើងសព្វថ្ងៃនេះមិនចាប់អារម្មណ៍ចំនុចនេះទេ ពីព្រោះពួកអ្នកអធិប្បាយមិនចង់បន្ទោសពួកអ្នកស្តាប់របស់ពួកគេយ៉ាងខ្លាំងនោះឡើយ។ ប៉ុន្តែពួកហោរាស្មោះត្រង់របស់ព្រះមិនដែលធ្វើអោយអ្វី ដែលព្រះមានបន្ទូល ស្រាលនិងស្រួលជាងឡើយ ហើយព្រះបន្ទូលរបស់ព្រះតែងតែប្រឆាំងនឹងអំពើបាបយ៉ាងខ្លាំង។
៥. ទាំងការវិនិច្ឆ័យនិងសេចក្តីសន្យាគឺបានរំលឹកយើងថា យើងពិតជាត្រូវការជំនួយរបស់ព្រះជាម្ចាស់មែន។ ការវិនិច្ឆ័យ ដែលអំពើបាបរបស់យើងសមនឹងទទួល គឺអាក្រក់ខ្លាំងជាងគ្រោះកាចកណ្តូបទៅទៀត។ សេចក្តីសន្យាអំពីការប្រទានព្រះវិញ្ញាណបានរំលឹកយើងថា យើងត្រូវការជំនួយរបស់ព្រះ ដើម្បីផ្លាស់ប្ដូរចិត្តរបស់យើង ហើយដើម្បីស្គាល់ទ្រង់។ សេចក្តីត្រូវការទាំងនេះត្រូវបានបំពេញសំរេចតាមរយៈព្រះយេស៊ូវ។ នៅលើឈើឆ្កាង ព្រះយេស៊ូវបានទទួលយកគ្រោះកាចនៃការវិនិច្ឆ័យសំរាប់អំពើបាបរបស់យើង (២កូរិនថូស ៥:២១; ១ពេត្រុស ២:២៤) ហើយបន្ទាប់មកបានសន្យា (យ៉ូហាន ១៤:១៦) ហើយបានប្រទាន (កិច្ចការ ២) អំណោយទានជាព្រះវិញ្ញាណបរិសុទ្ធ។
៦. ដូចដែលព្រះបានហៅរាស្ត្ររបស់ទ្រង់អោយទួញសោកនិងទ្រហោយំ ដោយព្រោះអំពើបាបរបស់ពួកគេ ព្រះក៏បានហៅគ្រីស្ទបរិស័ទអោយទួញសោកនិងទ្រហោយំ ដោយព្រោះអំពើបាបរបស់យើងផងដែរ (យ៉ាកុប ៤:៩; សូមមើល ៥:១ ផងដែរ)។
Leave a Reply