ដៃគូក្នុងដំណឹងល្អ
ដៃគូក្នុងដំណឹងល្អ DKDL ត្រូវបានបង្កើតឡើងដើម្បីជួយដល់ពួកជំនុំខ្មែរក្នុងការបំរើដំណឹងល្អនៃព្រះគ្រីស្ទ និងប្រទេសកម្ពុជា ដោយបំពាក់បំប៉នគ្រីស្ទបរិស័ទតាមរយៈការផ្គត់ផ្គង់ធនធានតាមប្រព័ន្ធអ៊ីនធឺណិត ដែលមានព្រះគម្ពីរជាមូលដ្ឋានគ្រឹះ ហើយវាក៏ជាមធ្យោបាយមួយក្នុងការសំរបសំរួលភាពជាដៃគូផងដែរ។
យើងបានជឿជាក់ ថា ព្រះគ្រីស្ទគឺជាព្រះអម្ចាស់ និងជាព្រះអង្គសង្គ្រោះរបស់យើង ហើយព្រះគម្ពីរគឺជាសៀវភៅតែមួយគត់ ដែលយើងគួរទុកចិត្តបាន ក៏ជាព្រះបន្ទូលដ៏មានអំណាចបំផុតរបស់ព្រះជាម្ចាស់ ដែលនាំយើងទៅកាន់ព្រះគ្រីស្ទ ជីវិតបរិសុទ្ធ និងសារៈសំខាន់នៃពួកជំនុំនៅក្នុងតំបន់។
គ្រូបង្រៀននៅក្នុងស្រុកខ្មែរ ដែលជួយផ្តល់ធនធានឯកសារ មានរួមទាំងប្រជាជនខ្មែរ និងបេសកជនដែលធ្វើការនៅក្នុងស្រុកខ្មែរអស់រយៈពេលដ៏យូរ។ ពួកគាត់ចង់ឃើញការអប់រំដ៏ជ្រៅជ្រះនិងស្មោះត្រង់អំពីព្រះគម្ពីរ បានរីកដុះដាលនៅក្នុងជីវិតរបស់គ្រីស្ទបរិស័ទគ្រប់ៗរូប។ យើងមានធនធានឯកសារដែលត្រូវបានបកប្រែពីឯកសារជាភាសាបរទេសរបស់ពួកគ្រូគង្វាលគ្រីស្ទបរិស័ទ និងសាស្រ្តាចារ្យដែលពួកគាត់មានសេចក្តីជំនឿ សេចក្ដីបង្រៀន និងជីវិតរស់នៅតាមព្រះគម្ពីរ។
ធនធានឯកសារនានានៅក្នុងគេហទំព័រនេះ អាចទាញយកបានដោយឥតគិតថ្លៃ និងអាចបោះពុម្ភ (ព្រីន) ព្រមទាំងអាចធ្វើការចែករំលែកជាមួយនឹងមនុស្សដទៃទៀតបាន ប៉ុន្តែមិនអនុញ្ញាតិឲ្យធ្វើការលក់ដូរដើម្បី ប្រាក់កម្រៃឡើយ។
