ភីលីព ១:១-១១
ដៃគូនៅក្នុងដំណឹងល្អ
សូមអានភីលីព ១:១-១១ ទាំងមូល។
សូមអាន ខ១-២ ម្ដងទៀត។
តើលោកប៉ុលបានសរសេរសំបុត្រនេះទៅកាន់នរណា?
ការពន្យល់ ពាក្យ ‹អ្នកត្រួតត្រា› ‹ចាស់ទុំ› និង ‹គ្រូគង្វាល› បានជំនួសគ្នានៅក្នុងសញ្ញាថ្មី គឺថាទាំងបីគឺជាឋានៈឬតួនាទីដូចគ្នា។ ដូច្នេះនៅក្នុងខ១ នៅពេលលោកប៉ុលសរសេរសំបុត្រនេះទៅកាន់ ‹អ្នកត្រួតត្រា› នោះមានន័យថាគាត់បានសរសេរទៅកាន់គ្រូគង្វាល (គឺចាស់ទុំ)។
សូមអាន ខ៣-៦
ហេតុអ្វីបានជាលោកប៉ុលទូលអង្វរដោយអំណរនៅពេលគាត់អធិស្ឋានឲ្យពួកភីលីព?
តើពួកភីលីពបានជួយលោកប៉ុលក្នុងដំណឹងល្អយ៉ាងដូចម្ដេច? សូមមើល ភីលីព ១:១៩ ២:២៥ ៤:១៤-១៨។
ការពន្យល់ និង អនុវត្តន៍ គ្រីស្ទបរិស័ទគឺជាដៃគូនៅក្នុងដំណឹងល្អ។ ជីវិតរបស់យើងត្រូវមានគោលបំណងបំរើដំណឹងល្អ ប៉ុន្តែយើងមិនបំរើដំណឹងល្អទីទៃពីគ្នានោះទេ។ យើងត្រូវរួមគ្នា និង ជួយគ្នាទៅវិញទៅមកក្នុងការបំរើដំណឹងល្អ ដូចជាពួកជំនុំនៅភីលីពបានជួយលោកប៉ុលដែរ។ តើអ្នកបានធ្វើអ្វីខ្លះដើម្បីនឹងសម្រេចតួនាទីជាដៃគូនៅក្នុងដំណឹងល្អ? តើសមាជិកនៅពួកជំនុំមានអាកប្បកិរិយា(ដែលបង្ហាញ)ថា គេជាដៃគូនៅក្នុងដំណឹងល្អ ឬទេ? សូមពិភាក្សា។
សូមអាន ខ៧-៨
ការពន្យល់ និង អនុវត្តន៍ ស្ថានភាពរបស់លោកប៉ុលគឺគាត់ជាប់ចំណងពីព្រោះគាត់ប្រកាសដំណឹងល្អ ប៉ុន្តែគាត់មិនក្រៀមក្រំទេ ផ្ទុយទៅវិញ គាត់មានអំណរដោយព្រោះពួកភីលីពបានជួយគាត់នៅក្នុងដំណឹងល្អ។ តើអ្នកនឹងមានអាកប្បកិរិយាយ៉ាងម៉េចប្រសិនបើអ្នកជាប់គុកដោយព្រោះដំណឹងល្អ ម្តងវិញនោះ?
សូមអាន ខ៩-១១
តើលោកប៉ុលបានអធិស្ឋានយ៉ាងដូចម្តេចសំរាប់ពួកភីលីព?
ការពន្យល់ និង អនុវត្តន៍ សូមកត់សំគាល់ថា ទោះបីជាលោកប៉ុលជាប់គុកក៏ដោយ ក៏គាត់នៅតែបន្តអធិស្ឋានអំពីជីវិតខាងឯព្រលឹងវិញ្ញាណរបស់គ្រីស្ទបរិស័ទជានិច្ច។ គាត់មិនគ្រាន់តែគិតអំពីតម្រូវការរបស់ខ្លួនប៉ុណ្ណោះទេ។ តើយើងបានរៀនអ្វីខ្លះពីគំរូរបស់លោកប៉ុល?
ចូរយកខ៩-១១ជាគំរូសំរាប់អ្នក និង អធិស្ឋានសំរាប់សមាជិកនៅពួកជំនុំ។
រំលឹកឡើងវិញ តើអ្នកបានរៀនអ្វីខ្លះពី ភីលីព ១:១-១១?
Leave a Reply