ភីលីព ៣:១-១១
ការស្គាល់ព្រះគ្រីស្ទ
ការពិភាក្សា តើអ្វីទៅដែលសំខាន់បំផុតនៅក្នុងជីវិតរបស់អ្នក
ការរំលឹក
នៅក្នុងភីលីព ២:១២-៣០ លោកប៉ុលបានណែនាំគ្រីស្ទបរិស័ទឲ្យប្រើជីវិតរបស់ខ្លួនបំភ្លឺនៅកណ្តាលមនុស្សដូចជាតួពន្លឺនៅក្នុងលោក ហើយបានសរសេរអំពីដៃគូក្នុងដំណឹងល្អ គឺលោកធីម៉ូថេ និង អេប៉ាប្រូឌីត។
សូមអាន ភីលីព ៣:១–១១ ទាំងមូល។
សូមអាន ខ១ ម្ដងទៀត។
នៅក្នុងខ១ តើលោកប៉ុលបានទូន្មានគ្រីស្ទបរិស័ទឲ្យធ្វើអ្វីខ្លះ?
សូមចាំថា នៅពេលប៉ុលបានសរសេរសំបុត្រនេះគាត់បានជាប់នៅក្នុងគុក ហើយគ្រីស្ទបរិស័ទនៅទីក្រុងភីលីពបានទទួលការបៀតបៀន ប៉ុន្តែប៉ុលនៅតែមានចិត្តអរសប្បាយក្នុងព្រះអម្ចាស់ដដែល។
ចូរអាន ខ២។ តើលោកប៉ុលបានព្រមានពួកជំនុំនៅភីលីពអំពីនរណា?
ការពន្យល់ ‹ពួកឆ្កែ…ពួកកាត់ស្បែកក្លែងក្លាយ› គឺជាពួកគ្រូក្លែងក្លាយដែលអួតពីខ្លួន អួតពីសកម្មភាពខាងសាសនា ហើយសន្មត់ថា ព្រះជាម្ចាស់នឹងទទួលគេ (គឺគេបានទទួលសេចក្ដីសង្គ្រោះ) ដោយសារកិច្ចការដែលគេបានធ្វើ។ គេពឹងផ្អែក ឬទុកចិត្តទៅលើភាពសុចរិតរបស់ខ្លួនឯង។ នៅក្នុងស្ថានភាពនៅទីក្រុងភីលីពលោកប៉ុលសរសេរអំពីសាសន៍យូដាដែលពឹងផ្អែកទៅលើការកាត់ស្បែក។
សូមអាន ខ៣។
តើនៅក្នុងខនេះលោកប៉ុលបានសរសេរយ៉ាងដូចម្តេចដើម្បីឆ្លើយតបនឹងបញ្ហាដែលបង្កឡើយដោយពួកកាត់ស្បែកក្លែងក្លាយនោះ?
សូមអាន ខ៤-៦។ ហេតុអ្វីបានជាលោកប៉ុលនិយាយថា លោកអាចទុកចិត្តខ្លួនឯង?
សូមអាន ខ៧-៩។ ឥឡូវនេះ ដោយសារតែលោកប៉ុលបានស្គាល់ព្រះគ្រីស្ទ គាត់បានរាប់ថា ‹សេចក្តីអ្វីដែលមានប្រយោជន៍ដល់ខ្ញុំពីមុន› (គ.ខ.ប. ‹អ្វីៗដែលខ្ញុំធ្លាប់គិតថា មានតម្លៃសំរាប់ខ្ញុំ›) គឺជាអ្វីទៅវិញ?
តាមរយៈអត្ថបទនេះ តើសេចក្តីដែលលោកប៉ុលនិយាយថា ដែលប្រសើរជាងនោះ គឺជាអ្វីទៅ?
តាមរយៈអត្ថបទនេះ តើលោកប៉ុលបានទទួលសេចក្ដីសុចរិតមកពីណា?
ការអនុវត្តន៍ នៅពេលដែលអ្នកឈរនៅពីមុខទីជំនុំជំរះរបស់ព្រះគ្រីស្ទ បើព្រះគ្រីស្ទទ្រង់សួរថា ‹ហេតុអ្វីបានជាអ្នកអាចចូលទៅឯស្ថានសួគ៌បាន?› តើអ្នកនឹងឆ្លើយថាយ៉ាងម៉េច
បើសិនជាយើងឆ្លើយតបទៅនឹងសំនួរថា ‹ហេតុអ្វីបានជាអ្នកអាចចូលទៅឯស្ថានសួគ៌បាន› ដោយចម្លើយថា ‹ពីព្រោះខ្ញុំជាមនុស្សល្អ› ឬ ‹ពីព្រោះខ្ញុំបានស្ដាប់បង្គាប់ព្រះអង្គ› ចម្លើយដូចនោះ នឹងបង្ហាញថាយើងមិនទាន់យល់ដល់ដំណឹងល្អនៅឡើយទេ។ ដំណឹងល្អបានប្រកាសថា យើងជាមនុស្សទុច្ចរិត ប៉ុន្តែព្រះជាម្ចាស់បានរាប់យើងជាសុចរិតដោយសារព្រះគ្រីស្ទ ហើយយើងទទួលព្រះពរនេះដោយសារយើងទុកចិត្តទៅលើព្រះគ្រីស្ទ គឺមានន័យថាយើងមិនទុកចិត្តទៅលើខ្លួនឯងឡើយ។
ការជជែកគ្នា តើមានអ្វីនៅក្នុងជីវិត (សកម្មភាពល្អ សមត្ថភាពល្អ អំពើល្អ ឬ ជំនាញល្អ) ដែលអ្នកសន្មត់ថាវានឹងនាំឲ្យព្រះអង្គផ្តល់សេចក្តីសង្គ្រោះដល់អ្នក ហើយទទួលអ្នកទៅឯស្ថានសួគ៌
តើអ្នកគិតថា ការស្គាល់ព្រះគ្រីស្ទវាប្រសើរជាងអ្វីៗទាំងអស់មែនឬ? តើមានភស្តុតាងអ្វីខ្លះនៅក្នុងជីវិតអ្នក ដែលគាំទ្រដល់ចម្លើយនេះ
ចូរអាន ខ១០-១១។
តើមានអ្វីខ្លះទៅដែលជាបំណងរបស់លោកប៉ុល?
ការជជែកគ្នា តើអ្នកមានបំណងដូចគ្នានឹងលោកប៉ុលនៅក្នុងខ១០-១១ដែរឬទេ?
សេចក្ដីសង្ខេប ដោយព្រោះលោកប៉ុលបានរាប់ថាការស្គាល់ដល់ព្រះគ្រីស្ទ និង ការទទួលសេចក្ដីសុចរិតដោយសារព្រះគ្រីស្ទ ប្រសើរជាងអ្វីៗទាំងអស់ ដូច្នេះគាត់សប្បាយរីករាយនឹងការដោះដូរទាំងអស់នេះណាស់ គឺគាត់ចាកចោលអ្វីៗដែលមនុស្សអួត និងរាប់អាន ដើម្បីវិលមកប្រកបក្នុងការរងទុក្ខជាមួយនឹងព្រះគ្រីស្ទ ព្រមទាំងសេចក្តីស្លាប់វិញផង។
រំលឹកឡើងវិញ តើអ្នកបានរៀនអ្វីខ្លះចេញពី ភីលីព ៣:១-១១?
ការអនុវត្តន៍ និង ជជែកគ្នា អ្វីដែលយើងបានរៀនតាមរយៈបទគម្ពីរខាងលើនេះ តើយើងត្រូវយកវាមកអនុវត្តន៍ចំពោះខ្លួនយើងយ៉ាងដូចម្តេចនាពេលសព្វថ្ងៃនេះ?
Leave a Reply